Şu gün Magtymguly Pyragynyň döredijilik mirasyny öwrenmäge, dünýäde giňden wagyz etmäge, nesilleri milli gymmatlyklarymyza, däp-dessurlarymyza hormat goýmak ruhunda, ynsanperwer häsiýetlerde terbiýelemäge uly goşandyny goşmak arkaly dürli ulgamlarda zähmet çekip, aýratyn tapawutlanan raýatlarymyzy hormatly Prezidentimiz Serdar Berdimuhamedowyň gol çeken resminamalaryna laýyklykda, Türkmenistanyň «Magtymguly Pyragynyň 300 ýyllygyna» atly ýubileý medaly, «Magtymguly Pyragynyň 300 ýyllygyna» atly ýadygärlik nyşanlar bilen sylaglamak dabaralary geçirildi.

Dabaralar ähli toplumlarda geçirilip, olara Türkmenistanyň Mejlisiniň Başlygy, Ministrler Kabinetiniň Başlygynyň orunbasarlary gatnaşdylar. Olar ýygnananlary Halkara Bitaraplyk güni bilen mähirli gutladylar hem-de halkymyzyň bagtyýarlygynyň, ýurdumyzyň abadançylygynyň, Watanymyzy gülledip ösdürmegiň bähbidine alyp barýan işlerinde täze üstünlikleri arzuw etdiler. Sylaglananlaryň hatarynda Mejlisiň deputatlary, daşary ýurtlarda döwletimiziň bähbitlerine wekilçilik edýän diplomatlar, döredijilik, medeniýet we sungat, köpçülikleýin habar beriş serişdeleri, bilim, ylym, saglygy goraýyş, sport ulgamlarynyň işgärleri, jemgyýetçilik guramalarynyň, maliýe, söwda, bank, ykdysadyýet, ýangyç-energetika, gurluşyk-senagat, oba hojalyk, ulag-kommunikasiýa pudaklarynyň wekilleri, harby we hukuk goraýjy edaralaryň işgärleri bar. Bu dabaralar Watana ak ýürekden hyzmat etmekde öz tejribelerini, bilimlerini, zehinini bagyş edýän ussat hünärmenlere ýurdumyzda uly hormat-sarpa bilen garalýandygynyň ýene-de bir aýdyň güwäsine öwrüldi.

Dabaralara gatnaşyjylar mynasyp bolan sylaglaryny ýüzlerine sylyp kabul edip, halkymyzyň abadançylygynyň, Watanymyzyň şöhratyny has-da artdyrmagyň bähbidine çeken zähmetlerine ýokary baha berendigi üçin hormatly Prezidentimize tüýs ýürekden hoşallyk bildirdiler. Çykyş edenleriň nygtaýyşlary ýaly, olar bu sylaglaryny häzirki bagtyýar günümizi we nurana geljegimizi gurýan ähli ildeşlerimiz bilen paýlaşýarlar. Dabaralara gatnaşyjylar hormatly Prezidentimize, Gahryman Arkadagymyza iň oňat arzuwlaryny aýdyp, öz ähli güýç-kuwwatyny, ukyp-başarnyklaryny giň gerimli özgertmeleri amala aşyrmaga bagyşlajakdyklaryna ynandyrdylar. Şol özgertmeler halkymyzyň agzybirligini we jebisligini mundan beýläk-de pugtalandyrmaga, jemgyýetde durnuklylygy üpjün etmäge, Watanymyzyň rowaçlygyna gönükdirilendir.

Türkmen edebiýatynyň nusgawy şahyrynyň döredijilik mirasyny öwrenmekde, aýawly saklamakda, wagyz etmekde we geljek nesillere ýetirmekde, Türkmenistanyň dünýä döwletleri, halkara guramalar bilen medeni gatnaşyklaryny ösdürmekde, medeniýetleri ýakynlaşdyrmakda we baýlaşdyrmakda, halklaryň arasynda dostlugy, hyzmatdaşlygy berkitmekde görkezen aýratyn hyzmatlary üçin, şeýle hem Magtymguly Pyragynyň doglan gününiň 300 ýyllygy mynasybetli, daşary ýurtly raýatlaryň-da Türkmenistanyň «Magtymguly Pyragynyň 300 ýyllygyna» atly ýubileý medaly hem-de «Magtymguly Pyragynyň 300 ýyllygyna» atly ýadygärlik nyşanlar bilen sylaglanandyklaryny bellemek gerek. Munuň özi Halkara Bitaraplyk gününiň öňüsyrasynda sylaglara mynasyp bolanlar üçin ýatdan çykmajak ajaýyp waka öwrüldi.

Dabaralarda aýdym-sazlar hem ýaňlandy. Sungat ussatlarynyň çykyşlarynda halkymyzyň Magtymguly Pyragynyň edebi mirasyna, hormatly Prezidentimize buýsanjy şahyrana dilde, hoş owazlaryň üsti bilen beýan edildi.

Sylaglamak dabaralary ýurdumyzyň welaýatlarynda-da geçirildi.