Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz Awstriýa Respublikasyna saparynyň çäklerinde Atom energiýasy boýunça halkara agentliginiň Baş direktory Rafael Grossi bilen duşuşdy.

Söhbetdeşler mähirli salamlaşyp, özara gyzyklanma bildirilýän meseleler boýunça pikir alyşmak üçin dörän mümkinçilige kanagatlanma bildirdiler.

Gahryman Arkadagymyz Türkmenistanyň halkara derejesinde ykrar edilen hemişelik Bitaraplyk hukuk derejesine laýyklykda, ählumumy we sebit howpsuzlygyny pugtalandyrmaga gönükdirilen daşary syýasaty yzygiderli durmuşa geçirýändigini belledi.

Rafael Grossi Türkmenistanyň atom energiýasyny parahatçylykly ulanmak ýörelgelerine ygrarlylygyna MAGATE-de ýokary baha berilýändigini belläp, ýurdumyzyň energetika we ekologiýa howpsuzlygyny pugtalandyrmak ulgamynda öňdengörüjilikli syýasatynyň we halkara başlangyçlarynyň Guramada goldanylýandygyny nygtady.

Ýadro howpsuzlygy babatdaky esasy halkara şertnamalaryna goşulan ilkinji döwletleriň biri bolmak bilen, ýurdumyz belent ynsanperwer ýörelgelere ygrarlydygyny iş ýüzünde subut edýär.

Duşuşykda soňky ýyllarda özara hyzmatdaşlygyň hil taýdan täze derejä çykarylýandygyna üns çekildi. Gahryman Arkadagymyz Türkmenistanyň atom energiýasyny diňe parahatçylykly maksatlar üçin ulanmak ugrunda çykyş edýändigini nygtady.

Milli saglygy goraýyş ulgamy hyzmatdaşlygyň möhüm ugurlarynyň biri bolup durýar. Agentligiň goldaw bermeginde ýurdumyzda keselleri anyklamagyň we bejermegiň döwrebap usullary ornaşdyrylýar. Hususan-da, halkara bilermenleriniň maslahatlary Türkmenistanyň ugurdaş edaralarynda howply kesellere garşy göreşmek ulgamyny kämilleşdirmäge hem-de ilata edilýän lukmançylyk hyzmatlarynyň hilini ýokarlandyrmaga ýardam berdi.

Hyzmatdaşlygy mundan beýläk-de pugtalandyrmak halkara-hukuk binýadyny giňeltmek bilen berk baglanyşyklydyr. Türkmenistanyň adatdan daşary ýagdaýlarda dessin habar bermek we özara kömek bermek baradaky ählumumy konwensiýalara goşulmagy munuň aýdyň subutnamasydyr. Bu ädimler döwletimiziň ählumumy radiasiýa howpsuzlygyny üpjün etmäge gönükdirilen halkara mehanizmlerine işjeň gatnaşmaga taýýardygyny görkezýär.

Söhbetdeşligiň dowamynda 2026 – 2030-njy ýyllar üçin tehniki hyzmatdaşlygyň ileri tutulýan ugurlaryny kesgitlejek täze Çarçuwaly ýurt maksatnamasyny taýýarlamak meselelerine garaldy. Bu resminama ýadro lukmançylygynda innowasion tehnologiýalary ornaşdyrmaga, şeýle hem halk hojalygynyň dürli pudaklarynda howpsuzlyk derejesini ýokarlandyrmaga gönükdirilen geljegi uly taslamalary amala aşyrmak üçin ygtybarly binýat bolar.

Gahryman Arkadagymyz deňze çykalgasy bolmadyk ösüp barýan döwletleri goldamagyň möhümdigine hem ünsi çekdi. Olar üçin parahatçylykly atomdan peýdalanmak mümkinçiligi ösüşiň güýçli guraly bolup biler. Şunuň bilen baglylykda, Gahryman Arkadagymyz geçen ýylyň awgust aýynda Awazada geçirilen BMG-niň Deňze çykalgasy bolmadyk ösüp barýan döwletler boýunça üçünji maslahatyna MAGATE-niň wekiliýetiniň gatnaşandygy üçin Rafael Grossä minnetdarlyk bildirdi.

Merkezi Aziýada ýadro ýaragyndan azat zolak hakyndaky Şertnama gol çekilmeginiň we ýurdumyzyň Agentlige agza bolmagynyň şanly seneleri bilen baglylykda, türkmen halkynyň Milli Lideri Aşgabatda ýokary derejedäki sebit forumyny guramagy teklip etdi. Şeýle çäre sebitiň ýurtlarynyň we halkara bilermenleriniň tagallalaryny birleşdirip, möhüm meseleleri ara alyp maslahatlaşmaga ýardam eder.

Şeýle hem söhbetdeşligiň dowamynda halkara gün tertibiniň möhüm meseleleri babatda pikir alşyldy. Gahryman Arkadagymyz Türkmenistanyň hemişelik Bitaraplyk ýörelgelerine ygrarly bolmak bilen, dünýäde durnuklylygyň we parahatçylygyň tarapdary bolup çykyş edýändigini aýtdy. Şunda diňe netijeli dialog we özara ynanyşmak arkaly uzak möhletli durnuklylyga ýetip boljakdygy nygtaldy.

Duşuşygyň ahyrynda türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz hem-de Atom energiýasy boýunça halkara agentliginiň Baş direktory Rafael Grossi Türkmenistan bilen MAGATE-niň arasyndaky köpugurly hyzmatdaşlygyň mundan beýläk-de ösdüriljekdigine ynam bildirip, bu hyzmatdaşlygyň parahatçylygyň, ösüşiň hem-de geljekki nesilleriň abadançylygynyň bähbidine hyzmat etjekdigini nygtadylar.