Şu ýylyň aprel aýynda guralan saparlar, geçirilen dürli çäreler, şol sanda duşuşyklar, syýasy geňeşmeler, işewürlik gepleşikleri, forumlar Garaşsyz, baky Bitarap Watanymyzyň barha artýan halkara abraýynyň, hormatly Prezidentimiz Serdar Berdimuhamedowyň baştutanlygynda üstünlikli durmuşa geçirilýän «Açyk gapylar» we halkara hyzmatdaşlyk syýasatynyň netijesidir.

1-nji aprelde Türkmenistanyň we Tunis Respublikasynyň daşary syýasat edaralarynyň ýolbaşçylarynyň arasynda geçirilen telefon arkaly söhbetdeşligiň dowamynda ikitaraplaýyn gün tertibiniň möhüm meseleleri ara alnyp maslahatlaşyldy, syýasy-diplomatik, söwda-ykdysady, medeni-ynsanperwer gatnaşyklary mundan beýläk-de pugtalandyrmaga özara gyzyklanma bildirildi.

1-nji aprelde ýurdumyzyň wekiliýetiniň Azerbaýjan Respublikasyna saparynyň çäklerinde Azerbaýjanyň ulag, aragatnaşyk we ýokary tehnologiýalar ministri Raşad Nabiýew, ykdysadyýet ministri Mikail Jabbarow, “Azerbaýjan demir ýollary” ýapyk görnüşli paýdarlar jemgyýetiniň başlygy Rowşan Rustamow, “Baku Halkara deňiz porty” jogapkärçiligi çäklendirilen jemgyýetiniň direktory Eldar Salahow bilen duşuşyklar geçirildi. Olarda ulag-logistika, söwda-ykdysady ulgamlarda ikitaraplaýyn hyzmatdaşlygy işjeňleşdirmek bilen baglanyşykly meseleleriň giň toplumyna garaldy.

2-nji aprelde Türkmenistanyň wekiliýeti Baku şäherinde geçirilen Türki Döwletleriň Guramasyna agza döwletleriň Hökümet Baştutanlarynyň (wise-prezident) ikinji duşuşygyna gatnaşdy. Onuň gün tertibine köptaraplaýyn hyzmatdaşlygy giňeltmegiň, ulag-logistika geçelgelerini ösdürmegiň, söwda, maýa goýumlar, sanly ykdysadyýet, energetika, senagat, oba hojalygy, medeni-ynsanperwer ulgamlardaky özara gatnaşyklaryň meseleleri girizildi. Mundan başga-da, taryhy-medeni gymmatlyklaryň, däp-dessurlaryň umumylygyna, özara ynama esaslanýan döwletara gatnaşyklary mundan beýläk-de pugtalandyrmagyň ähmiýeti nygtaldy. Halkara guramalaryň, ilkinji nobatda, Birleşen Milletler Guramasynyň çäklerinde halkara howpsuzlygy, durnukly ösüşi üpjün etmek, netijeli hyzmatdaşlyk etmek meselelerinde tagallalary utgaşdyrmagyň zerurdygyna aýratyn üns çekildi.

1 — 3-nji aprel aralygynda ýurdumyzyň wekiliýeti Russiýa Federasiýasynyň Tatarystan Respublikasynyň paýtagtynda geçirilen «Energoprom — 2026» atly Kazan halkara elektroenergetika forumyna gatnaşdy. Forumyň çäklerinde GDA-nyň elektroenergetika Geňeşiniň nobatdaky mejlisi geçirilip, onuň barşynda energiýa ulgamlaryny utgaşdyrmak, ýangyç-energetika toplumyny ösdürmek, sanlylaşdyrmak we energetika infrastrukturasynyň ygtybarlylygyny ýokarlandyrmak meselelerine garaldy. Bu ýerde guralan ýöriteleşdirilen elektroenergetika sergisinde 100-den gowrak kompaniýa döwrebap tehnologik çözgütleri we täze ugurdaş enjamlary bilen tanyşdyrdy. Halkara elektroenergetika forumynyň çäklerinde Türkmenistanyň we Russiýa Federasiýasynyň energetika ministrleriniň arasynda duşuşyk geçirilip, onda bu ugurdaky ikitaraplaýyn gatnaşyklaryň geljegine garaldy.

2 — 4-nji aprelde Diýarymyzda ilkinji gezek geçirilen «Hyzmatdaşlyk we ösüş» atly köpugurly halkara sergi gyzyklanma bildirýän taraplar bilen özara bähbitli hyzmatdaşlygy ýola goýmaga, ýurdumyzyň hususy önüm öndürijileriniň işewürlik mümkinçilikleri bilen tanyşdyrmaga gönükdirildi. Paýtagtymyzdaky Söwda-senagat edarasynda ýaýbaňlandyrylan giň gerimli gözden geçirilişe ýurdumyzyň we daşary döwletleriň iri kärhanalarynyň 100-e golaýy öz diwarlyklary bilen gatnaşdy.

5-nji aprelde Türkmenistanyň wekiliýeti Kabul şäherinde geçirilen «Merkezi Aziýa — Owganystan» konsultatiw dialogyna gatnaşdy. Taraplar Owganystany dikeltmek, onuň ählumumy gatnaşyklar ulgamyna goşulyşmagy bilen baglanyşykly bilelikdäki taslamalary durmuşa geçirmek ugrunda hyzmatdaşlygy giňeltmegiň meselelerini ara alyp maslahatlaşdylar.

6-njy aprelde Türkmenistanyň we Türkiýe Respublikasynyň daşary syýasat edaralarynyň ýolbaşçylarynyň arasynda geçirilen telefon arkaly söhbetdeşligiň dowamynda döwletara gatnaşyklary özara gyzyklanma bildirilýän ugurlar boýunça ösdürmegiň meseleleri maslahatlaşyldy. Iki ýurduň halkara guramalaryň, iri halkara forumlaryň we duşuşyklaryň çäklerindäki hyzmatdaşlygyna hem aýratyn üns berildi.

Türkmenistanyň Daşary işler ministrliginde Yrak Respublikasynyň Türkmenistandaky ilçihanasynyň işler wagtlaýyn ynanylan wekili Jassim Mohammed Al-Attar bilen geçirilen duşuşykda dürli ulgamlarda ikitaraplaýyn hyzmatdaşlygy ösdürmegiň meseleleri barada pikir alşyldy.

7-nji aprelde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň we Russiýa Federasiýasynyň Federal Ýygnagynyň Federasiýa Geňeşiniň Başlygy Walentina Matwiýenkonyň arasynda telefon arkaly söhbetdeşlik geçirildi. Söhbetdeşligiň barşynda Gahryman Arkadagymyz Russiýa Federasiýasynyň parlamentiniň ýokarky palatasynyň ýolbaşçysyny doglan güni bilen öz adyndan hem-de hormatly Prezidentimiziň adyndan tüýs ýürekden gutlap, iň gowy arzuwlaryny beýan etdi.

8-nji aprelde Türkmenistanyň daşary işler ministriniň orunbasarynyň ýolbaşçylygyndaky ýurdumyzyň wekiliýetiniň Koreýa Respublikasyna amala aşyran iş saparynyň çäklerinde Seul şäherinde konsullyk meseleleri boýunça ikitaraplaýyn syýasy geňeşmeler geçirildi. Saparyň çäklerinde Koreýa Respublikasynyň Immigrasiýa gullugynyň komissary hem-de dostlukly ýurduň ýokary okuw mekdeplerinde bilim alýan türkmen talyplary bilen duşuşyklar geçirildi.

9-njy aprelde Seulda Türkmenistanyň we Koreýa Respublikasynyň daşary syýasat edaralarynyň arasynda geçirilen syýasy geňeşmeleriň dowamynda döwletara gatnaşyklaryň ýokary derejesi kanagatlanma bilen bellenildi we özara bähbitli hyzmatdaşlygy mundan beýläk-de ösdürmek bilen bagly meseleleriň giň toplumyna garaldy. 10-njy aprelde ýurdumyzyň wekiliýeti «Merkezi Aziýa — Koreýa Respublikasy» hyzmatdaşlyk forumynyň ýokary wezipeli wekilleriniň maslahatyna, Merkezi Aziýa ýurtlarynyň daşary syýasat edaralarynyň ýolbaşçylarynyň orunbasarlarynyň gatnaşmagynda Koreýa Respublikasynyň daşary işler ministri Ço Hýon bilen geçirilen duşuşyga gatnaşdy.

8-nji aprelde ýurdumyzyň daşary syýasat edarasynda Ýewropa Bileleşiginiň Türkmenistandaky Adatdan daşary we Doly ygtyýarly ilçisi Beata Peksa bilen geçirilen duşuşykda ÝB-niň Aşgabatdaky wekilhanasy bilen ýola goýlan hyzmatdaşlygyň, şol sanda birnäçe bilelikdäki başlangyçlaryň oňyn häsiýeti nygtaldy hem-de netijeli dialogy dowam etdirmäge taýýarlyk tassyklanyldy.

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Awstriýa Respublikasyna sapary amala aşyryp, Energetika we howa boýunça halkara Wena forumyna gatnaşdy. Gahryman Arkadagymyz Awstriýa Respublikasynyň Federal Prezidenti Aleksandr Wan der Bellen, Atom energiýasy boýunça halkara agentligiň (AEHA) Baş direktory Rafael Grossi, Birleşen Milletler Guramasynyň Baş sekretarynyň orunbasary hanym Rabab Fatima, BMG-niň Senagat ösüşi boýunça guramasynyň (UNIDO) Baş direktory Gerd Müller, Türkmen-awstriýa jemgyýetiniň ýolbaşçysy Neda Berger bilen duşuşdy. Bellenilişi ýaly, ýurdumyzyň öňdengörüjilikli daşary syýasaty we halkara başlangyçlary BMG-niň möhüm maksatlarydyr wezipeleri, ilkinji nobatda, ählumumy parahatçylygy, durnuklylygy, howpsuzlygy üpjün etmek, Durnukly ösüş maksatlaryna ýetmek boýunça wezipeler bilen aýrylmaz baglanyşyklydyr.

10-njy aprelde Daşary işler ministrliginde Birleşen Milletler Guramasynyň Bilim, ylym we medeniýet meseleleri boýunça guramasynyň (ÝUNESKO) Almatydaky sebitleýin edarasynyň direktory Amir Piriç bilen sanly ulgam arkaly duşuşyk geçirildi. Onda medeni dialogy ösdürmek, milli we sebit derejesinde bilelikdäki taslamalary durmuşa geçirmek ýaly ileri tutulýan ugurlarda özara gatnaşyklaryň möhüm meselelerine üns çekildi.

14-nji we 20-nji aprelde ýurdumyzyň daşary syýasat edarasynda Bütindünýä Saglygy Goraýyş Guramasynyň (BSGG) Aşgabatdaky ýurt boýunça edarasynyň ýolbaşçysy Ýegor Zaýsew bilen geçirilen duşuşyklaryň dowamynda ýurdumyzyň bu abraýly gurama bilen hyzmatdaşlygynyň häzirki ýagdaýy hem-de geljekki ösüş mümkinçilikleri, şu ýyl üçin meýilleşdirilen bilelikdäki çäreler barada pikir alşyldy.

15-nji aprelde ýurdumyzyň Daşary işler ministrliginde Russiýa Federasiýasynyň Tatarystan Respublikasynyň Premýer-ministriniň orunbasary Wasil Şaýhraziýew bilen duşuşyk geçirildi. Onuň barşynda türkmen-tatar hyzmatdaşlygynyň ileri tutulýan ugurlary, şol sanda medeni-ynsanperwer ulgamdaky gatnaşyklary mundan beýläk-de ösdürmegiň mümkinçilikleri ara alnyp maslahatlaşyldy. 2026-njy ýylyň oktýabrynda Türkmenistanda geçirilmegi meýilleşdirilýän «Tatar kyzy» halkara bäsleşiginiň jemleýji tapgyryna taýýarlyk meselelerine aýratyn üns berildi. Şunuň bilen baglylykda, bu bäsleşigiň milli däpleri, ruhy gymmatlyklary gorap saklamakda we medeniýetara dialogy pugtalandyrmakda möhüm ähmiýeti bellenildi.

Daşary işler ministrliginde “BMG — Syýahatçylyk” guramasynyň Ýewropa boýunça sebitleýin direktorynyň wezipesini wagtlaýyn ýerine ýetiriji Kordula Wolmuter bilen geçirilen duşuşygyň dowamynda Türkmenistanyň Birleşen Milletler Guramasynyň bu ýöriteleşdirilen edarasy bilen hyzmatdaşlygynyň wajyp meseleleri ara alnyp maslahatlaşyldy. Şunuň bilen baglylykda, “BMG — Syýahatçylyk” guramasynyň wekiliýetiniň Aşgabatda geçirilen «Turkmentravel — 2026» atly halkara syýahatçylyk sergisine we maslahata gatnaşandygyny bellemek gerek.

15-nji aprelde Ermenistan Respublikasynyň Türkmenistandaky Adatdan daşary we Doly ygtyýarly ilçisi Arsen Awagýan bilen duşuşyk geçirilip, onuň barşynda ikitaraplaýyn we köptaraplaýyn görnüşde üstünlikli ösdürilýän türkmen-ermeni hyzmatdaşlygynyň möhüm ugurlary barada pikir alşyldy.

Aprel aýynda Hytaý Halk Respublikasynyň wekiliýetiniň ýurdumyza amala aşyran sapary türkmen-hytaý hyzmatdaşlygynyň ýokary derejesini nobatdaky gezek subut etdi. 15-nji aprelde türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz Hytaý Halk Respublikasynyň Başlygy Si Szinpiniň tabşyrygy boýunça ýurdumyza sapar bilen gelen Hytaýyň Kommunistik partiýasynyň Merkezi komitetiniň Syýasy býurosynyň hemişelik komitetiniň agzasy, HHR-iň Döwlet Geňeşiniň Premýeriniň birinji orunbasary Din Sýuesýan bilen duşuşdy. Bellenilişi ýaly, iň ýokary döwlet derejesinde ýola goýlan dialog syýasy-diplomatik ulgamda ýakyn hyzmatdaşlyk üçin berk binýady emele getirip, ykdysady, söwda, medeni-ynsanperwer gatnaşyklary ösdürmek babatda amatly şertleri üpjün edýär.

16-njy aprelde paýtagtymyzda Hyzmatdaşlyk boýunça türkmen-hytaý hökümetara komitetiniň ýedinji mejlisi geçirildi. Bu duşuşyk iň ýokary döwlet derejesinde gazanylan ylalaşyklary iş ýüzünde durmuşa geçirmegiň möhüm tapgyryna öwrülip, iki ýurduň hem hemmetaraplaýyn strategik hyzmatdaşlygy çuňlaşdyrmaga ygrarlydygyny tassyklady. Duşuşygyň dowamynda dürli ugurlary öz içine alýan döwletara gatnaşyklaryň yzygiderli ösdürilýändigi nygtaldy. Mejlisiň netijeleri boýunça iki ýurduň hemmetaraplaýyn strategik hyzmatdaşlygy çuňlaşdyrmaga ygrarlydygyny tassyklaýan resminamalar toplumyna gol çekildi.

16-njy aprelde HHR-iň wekiliýetiniň gatnaşmagynda Ýagşygeldi Kakaýew adyndaky Halkara nebit we gaz uniwersitetiniň çäginde Türkmenistandaky “Lu Ban ussahanasynyň” açylyş dabarasynyň geçirilmegi iki ýurduň arasyndaky ynsanperwer hyzmatdaşlygyň has-da pugtalandyrylýandygynyň nobatdaky güwäsine öwrüldi.

16-njy aprelde Söwda-senagat edarasynda «Türkmenistan — Hytaý Halk Respublikasy: gaz pudagynda strategik hyzmatdaşlygyň 20 ýyly» atly halkara ylmy-amaly maslahat geçirildi.

17-nji aprelde Gahryman Arkadagymyzyň hem-de Hytaýyň Kommunistik partiýasynyň Merkezi komitetiniň Syýasy býurosynyň hemişelik komitetiniň agzasy, HHR-iň Döwlet Geňeşiniň Premýeriniň birinji orunbasary Din Sýuesýanyň gatnaşmagynda «Galkynyş» gaz käniniň dördünji tapgyryny özleşdirmäge badalga bermek dabarasy geçirildi. Mälim bolşy ýaly, şu ýylyň martynda «Türkmengaz» döwlet konserni bilen Hytaýyň Milli nebitgaz korporasiýasynyň (CNPC) arasynda degişli şertnama baglaşyldy.

Iki ýurduň arasynda saglygy goraýyş ulgamynda ýola goýlan gatnaşyklar hem täze many-mazmun bilen baýlaşdyrylýar. 15-nji aprelde Myrat Garryýew adyndaky Türkmenistanyň Döwlet lukmançylyk uniwersitetinde Pekiniň hytaý lukmançylygy uniwersitetiniň rektory Tan Çžişunyň ýolbaşçylygyndaky wekiliýet bilen geçirilen duşuşyk munuň aýdyň mysalydyr. Iki ýurduň uniwersitetleriniň arasynda Türkmen-hytaý adaty hytaý lukmançylygy merkezini döretmek barada özara düşünişmek hakynda Ähtnama gol çekilmegi Türkmenistanyň hem-de Hytaýyň netijeli hyzmatdaşlygyň gerimini has-da giňeltmäge ygrarlydyklaryny görkezdi. Şeýle hem Pekiniň hytaý lukmançylygy uniwersitetiniň wekiliýetiniň gatnaşmagynda Myrat Garryýew adyndaky Türkmenistanyň Döwlet lukmançylyk uniwersitetinde Adaty däl lukmançylyk otagynyň açylyş dabarasy boldy.

HHR-iň wekiliýeti ýurdumyza saparynyň çäklerinde Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň Arkadag şäherinde ýerleşýän ştab-kwartirasyna baryp gördi. Bu ýerde gaznanyň bejeriş işleri boýunça wise-prezidenti Oguljahan Atabaýewanyň Pekiniň hytaý lukmançylygy uniwersitetiniň rektory Tan Çžişu we onuň ýolbaşçylygyndaky wekiliýet agzalary bilen duşuşygy boldy. Myhman gaznanyň amala aşyrýan giň gerimli işlerine ýokary baha berip, hytaý tarapynyň Türkmenistan bilen saglygy goraýyş ulgamyndaky gatnaşyklary mundan beýläk-de ösdürmäge uly gyzyklanma bildirýändigini belledi. Duşuşykdan soňra, hytaýly myhmanlar Gurbanguly Berdimuhamedow adyndaky çagalar sagaldyş-dikeldiş merkezine we Arkadag şäheriniň Görogly adyndaky döwlet atçylyk sirkine baryp gördüler.

Ýurdumyzyň daşary syýasat ugrunyň durmuşa geçirilmeginde halkara we sebit guramalarynyň, beýleki köptaraply meýdançalaryň çäklerindäki netijeli hyzmatdaşlyga uly ähmiýet berilýär. Şunuň bilen baglylykda, 17-nji aprelde ýurdumyzyň wekiliýeti Moskwa şäherinde geçirilen Garaşsyz Döwletleriň Arkalaşygynyň daşary işler ministrleriniň Geňeşiniň nobatdaky mejlisine hem-de «Merkezi Aziýa — Russiýa» formatyndaky dokuzynjy duşuşyga gatnaşdy.

18-nji aprelde Daşary işler ministrliginde Halkara Zähmet Guramasynyň Miranda Faýermanyň ýolbaşçylygyndaky wekiliýeti bilen duşuşyk geçirildi. Gepleşikleriň barşynda hyzmatdaşlygyň ulgamlaýyn we durnukly häsiýete eýedigi, bilelikdäki başlangyçlaryň durmuşa geçirilmeginde pudagara tagallalary utgaşdyrmagyň möhümdigi nygtaldy.

17-18-nji aprelde Türkmenistanyň Ministrler Kabinetiniň Başlygynyň orunbasary, daşary işler ministri R.Meredowyň ýolbaşçylygyndaky wekiliýet “Geljegi meýilleşdirmek, nämälimlikleri dolandyrmak” şygary astynda geçirilen bäşinji Antalýa diplomatiýa forumyna gatnaşdy. Forumyň çäklerinde “Bilelikdäki ösüş: Garaşsyzlygynyň 35 ýyllygy şertlerinde Merkezi Aziýa döwletleriniň ählumumy orny” ady bilen geçirilen mowzuklaýyn mejlisde Türkmenistanyň sebit durnuklylygyny we howpsuzlygyny pugtalandyrmak, serhetüsti düzümleýin ulgamlary ösdürmek bilen bagly garaýyşlary beýan edildi. Ýurdumyzyň energetika howpsuzlygyny üpjün etmek boýunça Birleşen Milletler Guramasynyň çäklerinde öňe sürýän başlangyçlaryna, ulag-logistika ulgamyny mundan beýläk-de kämilleşdirmegiň meselelerine aýratyn üns çekildi.

18-nji aprelde Türkmenistanyň wekiliýetiniň Türkiýe Respublikasyna saparynyň çäklerinde Ýadro synaglaryny ählumumy gadagan etmek barada şertnamasy guramasynyň (CTBTO) Ýerine ýetiriji sekretary Robert Floýd, Türki döwletleriň Söwda-senagat edaralarynyň birleşiginiň Baş sekretary Adem Kula, BMG-niň Baş sekretarynyň orunbasary, BMG-niň Siwilizasiýalar birleşiginiň Ýokary wekili Migel Anhel Moratinos hem-de birnäçe ýurtlaryň daşary syýasat edaralarynyň ýolbaşçylary bilen duşuşyklar geçirildi.

20-nji aprelde Ykdysady hyzmatdaşlyk boýunça türkmen-eýran hökümetara toparynyň bilelikdäki başlyklarynyň — Türkmenistanyň Ministrler Kabinetiniň Başlygynyň orunbasary, daşary işler ministri bilen Eýran Yslam Respublikasynyň ýol we şäher ösüşi ministriniň arasynda geçirilen telefon arkaly söhbetdeşligiň barşynda bu toparyň amala aşyrýan işi, ozal gazanylan ylalaşyklaryň durmuşa geçirilişi, ikitaraplaýyn gatnaşyklaryň ileri tutulýan ugurlary bilen bagly meseleleriň giň toplumy ara alnyp maslahatlaşyldy.

Aprel aýynda Türkmenistanyň wekiliýeti Tailand Patyşalygynyň Bangkok şäherinde geçirilen BMG-niň Aziýa — Ýuwaş umman sebiti üçin Ykdysady we Durmuş komissiýasynyň 82-nji sessiýasyna gatnaşdy. Mejlisiň barşynda sebitara hyzmatdaşlyk, Durnukly ösüş maksatlaryna ýetmek bilen bagly meseleler ara alnyp maslahatlaşyldy. Mowzuklaýyn pikir alyşmalaryň dowamynda ýurdumyzyň wekiliýeti sebit hyzmatdaşlygyny ösdürmek we häzirki döwrüň wehimlerine garşy göreşmek babatda döwletimiziň garaýyşlaryny beýan etdi. Hormatly Prezidentimiziň sebitiň howanyň üýtgemegine garşy durnuklylygyny berkitmäge gönükdirilen başlangyçlaryna aýratyn üns çekildi.

BMG-niň Aziýa — Ýuwaş umman sebiti üçin Ykdysady we Durmuş komissiýasynyň 82-nji sessiýasynyň çäklerinde BMG-niň Merkezi Aziýa ýurtlarynyň ykdysadyýetleri üçin Ýörite maksatnamasyna (SPECA) gatnaşyjy ýurtlaryň ministrler derejesindäki duşuşygy boldy. Duşuşygyň netijeleri boýunça Bilelikdäki Beýannama kabul edildi. Türkmenistanyň wekiliýetiniň saparynyň çäklerinde BMG-niň Aziýa — Ýuwaş umman sebiti üçin Ykdysady we Durmuş komissiýasynyň Ýerine ýetiriji sekretary Armida Salsiýa Alişahbana bilen duşuşyk geçirildi. Ol ýurdumyzyň halkara giňişlikdäki işjeň hereketlerine ýokary baha berdi.

21-nji aprelde Türkmenistanyň Mejlisiniň Başlygy D.Gulmanowa Özbegistan Respublikasynyň Daşkent şäherinde guralan Merkezi Aziýa döwletleriniň zenan ýolbaşçylarynyň dialogynyň mejlisine sanly ulgam arkaly gatnaşdy. «Merkezi Aziýanyň zenanlary: ileri tutulýan wezipeler we bilelikdäki hereketler» atly mowzukda geçirilen mejlisde bu dialogyň anyk başlangyçlary we taslamalary durmuşa geçirmäge, netijeli hyzmatdaşlygy ösdürmäge gönükdirilen meýdança öwrülendigi bellenildi.

21-22-nji aprelde Türkmenistanyň Daşary işler ministrliginiň Halkara gatnaşyklary institutynyň rektorynyň ýolbaşçylygyndaky wekiliýet Moskwada saparda boldy. Saparyň maksady türkmen diplomatiýasynyň milli mekdebi bilen Russiýa Federasiýasynyň Daşary işler ministrliginiň Moskwa döwlet halkara gatnaşyklary institutynyň arasyndaky özara gatnaşyklary işjeňleşdirmek meselelerini ara alyp maslahatlaşmakdan ybarat boldy. Dostlukly ýurduň abraýly ýokary okuw mekdebiniň ýolbaşçylary bilen geçirilen duşuşyklaryň barşynda 2017-nji ýylyň oktýabrynda gol çekilen degişli ikitaraplaýyn Ylalaşygy durmuşa geçirmegiň çäklerinde bilim edaralarynyň arasynda ylym-bilim ulgamyndaky hyzmatdaşlygyň mümkinçiliklerine garaldy. Şunuň bilen baglylykda, taraplar köptaraplaýyn gatnaşyklary giňeltmäge özara gyzyklanmalaryny tassykladylar.

Moskwa döwlet halkara gatnaşyklary institutynda Türkmenistan bilen Russiýa Federasiýasynyň arasyndaky halkara akademiki hyzmatdaşlygyň strategiýalaryna bagyşlanan “tegelek stol” maslahaty geçirildi. Şeýle hem saparyň çäklerinde Russiýa Federasiýasynyň Daşary işler ministrliginiň GDA ýurtlary boýunça üçünji departamentiniň direktory Aleksandr Sternik bilen duşuşyk geçirildi.

Aprel aýynda Türkmenistanyň BMG-niň ýanyndaky hemişelik wekili Wepa Hajiýew Birleşen Milletler Guramasynyň Baş sekretary Antoniu Guterrişe ynanç hatyny gowşurdy. Söhbetdeşligiň dowamynda BMG-niň Baş sekretary Türkmenistanyň hemişelik Bitaraplyk syýasatynyň sebitde durnuklylygyň berk binýady bolup hyzmat edýändigini aýratyn nygtady. Şunuň bilen baglylykda, Aşgabat şäherinde ýerleşýän BMG-niň Merkezi Aziýa üçin öňüni alyş diplomatiýasy boýunça sebit merkeziniň möhüm ähmiýeti bellenildi.

Geçen aýda ýurdumyzyň Daşary işler ministrliginde Koreýa Respublikasynyň, Italiýa Respublikasynyň, Argentina Respublikasynyň, Müsür Arap Respublikasynyň Türkmenistanda täze bellenilen Adatdan daşary we Doly ygtyýarly ilçileri bilen duşuşyklar geçirildi. Duşuşyklarda netijeli döwletara gatnaşyklary, syýasy-diplomatik, söwda-ykdysady, medeni-ynsanperwer ulgamlardaky hyzmatdaşlygy mundan beýläk-de pugtalandyrmaga gyzyklanma bildirilýändigi tassyklanyldy.

23-nji aprelde Birleşen Milletler Guramasynyň Ösüş maksatnamasynyň Türkmenistandaky hemişelik wekili Narine Saakýan bilen geçirilen duşuşygyň dowamynda Türkmenistan bilen bu düzümiň arasyndaky gatnaşyklaryň häzirki ýagdaýy we geljegi, hyzmatdaşlygyň dürli ugurlaryny öz içine alýan meseleler ara alnyp maslahatlaşyldy. Taslamalaýyn hyzmatdaşlygyň oňyn depgini, şol sanda bilelikde durmuşa geçirilýän başlangyçlaryň sanynyň yzygiderli artýandygy kanagatlanma bilen bellenildi.

27-nji aprelde Daşary işler ministrliginde Malaýziýanyň Türkmenistandaky Adatdan daşary we Doly ygtyýarly ilçisi Mohd Suhaimi bin Ahmad Tajuddin bilen duşuşyk geçirilip, onda ikitaraplaýyn gatnaşyklaryň ugurlaryň giň gerimi boýunça yzygiderli ösdürilýändigi nygtaldy. Şeýle hem şu ýyl Türkmenistan bilen Malaýziýanyň «PETRONAS» kompaniýasynyň arasynda ýola goýlan hyzmatdaşlyga 30 ýyl dolýandygy, şunuň bilen bir hatarda, bilim, ýokary derejeli hünärmenleri taýýarlamak boýunça netijeli gatnaşyklaryň alnyp barylýandygy bellenildi.

28-nji aprelde ýurdumyzyň daşary syýasat edarasynda Hytaý Halk Respublikasynyň Türkmenistandaky Adatdan daşary we Doly ygtyýarly ilçisi Szi Şumin bilen geçirilen duşuşygyň dowamynda şu ýylyň mart-aprel aýlarynda döwlet we hökümet derejesinde gazanylan ylalaşyklary iş ýüzünde amala aşyrmagyň meseleleri ara alnyp maslahatlaşyldy.

28 — 30-njy aprelde paýtagtymyzda geçirilen Türkmen-hytaý işewürler forumy we sergisi ikitaraplaýyn söwda-ykdysady hyzmatdaşlygy giňeltmekde, bu ugurdaky mümkinçilikleri, bilelikdäki taslamalary durmuşa geçirmekde netijeli meýdança bolup hyzmat etdi.

28-nji aprelde Daşary işler ministrliginde ýylyň başyndan bäri Türkmenistanyň halkara durmuşynda bolup geçen möhüm wakalara bagyşlanan brifing geçirildi. Oňa daşary ýurtlaryň we halkara guramalaryň Türkmenistandaky diplomatik wekilhanalarynyň ýolbaşçylary gatnaşdylar. Brifingde döwlet Baştutanymyzyň hem-de Gahryman Arkadagymyzyň şu ýylyň dowamynda daşary ýurtlara amala aşyran saparlarynyň ähmiýetine aýratyn üns çekildi. Şunda Milli Liderimiziň we Arkadagly Gahryman Serdarymyzyň öňe süren halkara başlangyçlarynyň ähmiýeti bellenildi.

Daşary işler ministrliginde ýurdumyza ilkinji gezek resmi sapar bilen gelen Seýşeller Respublikasynyň daşary işler we diaspora ministri Barri For bilen duşuşyk geçirildi. Taraplar döwletara syýasy-diplomatik dialogy işjeňleşdirmegiň möhümdigini nygtap, söwda-ykdysady, medeni-ynsanperwer ulgamlarda hyzmatdaşlygy ýola goýmagyň mümkinçiliklerine garadylar. Şeýle-de halkara guramalaryň, ilkinji nobatda, Birleşen Milletler Guramasynyň çäklerinde hyzmatdaşlyk etmegiň meseleleri ara alnyp maslahatlaşyldy.

30-njy aprelde Daşary işler ministrliginde Türki medeniýetiň halkara guramasynyň (TÜRKSOÝ) Baş sekretary Sultan Raýew bilen geçirilen duşuşykda Türkmenistanyň TÜRKSOÝ bilen özara hyzmatdaşlygynyň möhüm meseleleri, hususan-da, 2026-njy ýyl üçin bilelikdäki iş meýilnamasyny amala aşyrmagyň meseleleri ara alnyp maslahatlaşyldy. Duşuşygyň barşynda Sultan Raýewiň TÜRKSOÝ-yň opera günlerine hem-de görnükli türkmen kompozitory Weli Muhadowyň doglan gününiň 110 ýyllygyna bagyşlanan çärelere gatnaşmak üçin Aşgabada amala aşyran saparynyň ähmiýeti nygtaldy. Taraplar medeni-ynsanperwer dialogy ilerletmek boýunça hyzmatdaşlygyň we bilelikdäki başlangyçlaryň diňe bir bu gurama agza ýurtlaryň halklarynyň arasynda däl, eýsem, beýleki döwletler bilen hem parahatçylygy, özara düşünişmegi pugtalandyrmaga ýardam edýändigini tassykladylar.

Şeýlelikde, geçen aýyň wakalary hormatly Prezidentimiz Serdar Berdimuhamedowyň ählumumy durnukly ösüşi üpjün etmäge, Watanymyzyň netijeli halkara başlangyçlaryny durmuşa geçirmäge gönükdirilen döredijilikli, köpugurly daşary syýasatynyň rowaçlyklara beslenýändigini aýdyň görkezdi.