Ministrliklerde we pudak edaralarynda şu ýylyň bäş aýynyň jemlerine bagyşlanan Ministrler Kabinetiniň ýakynda geçirilen mejlisinde hormatly Prezidentimiz Gurbanguly Berdimuhamedow tarapyndan öňde goýlan wezipeleriň ýerine ýetirilmegi boýunça alnyp barylýan işler babatynda maslahatlar geçirildi. Hususan-da, bank –maliýe ulgamyny mundan beýläk-de kämilleşdirmek, kärhanalary hususylaşdyrmak we olary paýdarlar jemgyýetlerine öwürmek, nebitgaz önümleriniň öndürilýän möçberlerini artdyrmak, ulag we aragatnaşyk ulgamlarynyň, obasenagat toplumynyň netijeliligini ýokarlandyrmak, galla oragyny guramaçylykly geçirmek, hereket edýän senagat kärhanalarynyň durkuny täzelemek we täzelerini gurmak meselelerine garaldy. Ýapyk binalarda we söweş sungaty boýunça V Aziýa oýunlaryny guramaçylykly geçirmek boýunça taýýarlyk işlerine, bu ugurda ähli düzümleriň sazlaşykly işini üpjün etmek meselelerine aýratyn üns berildi. Maslahata gatnaşyjylar hormatly Prezidentimiz tarapyndan öňde goýlan hem-de mähriban Watanymyzyň mundan beýläk-de gülläp ösmegine gönükdirilen ähli wezipeleriň üstünlikli ýerine ýetirilmegi ugrunda tutanýerli zähmet çekjekdiklerine döwlet Baştutanymyzy ynandyrdylar.