Eýran Yslam Respublikasynyň Söwda, senagat, magdanlar we oba hojalyk edarasynyň ýolbaşçylary bilen wideomaslahat görnüşinde duşuşyk geçirilip, onda, esasan, milli ösüş meýilnamalary nazara alnyp, söwda-ykdysady gatnaşyklaryň geljegi uly ugurlary ara alnyp maslahatlaşyldy. Taraplar goňşy halklaryň köpasyrlyk dostluk we doganlyk gatnaşyklaryna esaslanan türkmen-eýran hyzmatdaşlygynyň netijeli häsiýetini belläp, däp bolan hyzmatdaşlygyň diňe bir özara bähbitlere laýyk gelmän, eýsem, tutuş sebitiň abadançylyk we gülläp ösüş maksatlaryna hyzmat edýändigini nygtadylar. Gyzyklanma bildirýän ähli hyzmatdaşlar bilen halkara söwda-ykdysady gatnaşyklaryň pugtalandyrylmagy hormatly Prezidentimiz Gurbanguly Berdimuhamedowyň baştutanlygynda üstünlikli durmuşa geçirilýän Türkmenistanyň daşary syýasat strategiýasynyň möhüm ugry bolupdy we şeýle bolmagynda galýar. Onlaýn duşuşyga gatnaşyjylar hyzmatdaşlygyň bar bolan ägirt uly kuwwatyny has doly peýdalanmagyň hem-de onuň amala aşyrylmagyna ykdysadyýetiň döwlete degişli bolmadyk ulgamynyň wekillerini işjeň çekmegiň zerurdygyny bellediler. Türkmenistan bilen Eýran Yslam Respublikasynyň uzak möhletleýin geljege niýetlenen hyzmatdaşlygynyň giň gerimli ugurlary özünde jemläp, iki ýurduň durmuş-ykdysady taýdan ösüşiniň ileri tutulýan ugurlaryna doly kybap gelýändigi bellenildi. Şunuň bilen baglylykda, taraplar özara hormat goýmak hem-de ikitaraplaýyn bähbitlilik ýörelgelerinde mundan beýläk-de netijeli gatnaşyk etmek maksady bilen, bilelikdäki şertleri döretmäge çemeleşmeleri işläp taýýarlamak üçin şunuň ýaly işewür duşuşyklary yzygiderli geçirmegiň wajypdygyny nygtadylar.