Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Özbegistan Respublikasynyň Prezidenti Şawkat Mirziýoýewe Prezident saýlawlarynda gazanan ynamly ýeňşi hem-de bu wezipä gaýtadan saýlanmagy mynasybetli tüýs ýürekden gutlaglaryny iberdi.

“Soňky ýyllarda Özbegistan Respublikasy Siziň baştutanlygyňyzda okgunly ösüş ýoly bilen ynamly öňe barýar, jemgyýetçilik durmuşynyň ähli ugurlarynda uly üstünlikleri gazanyp, dünýä giňişligindäki abraýyny barha pugtalandyrýar. Häzirki wagtda Türkmenistan bilen Özbegistan Respublikasynyň arasyndaky gatnaşyklar ýokary derejede ösdürilýär. Giň ugurlar, şol sanda syýasy-diplomatik, söwda-ykdysady, medeni-ynsanperwer ulgamlarda netijeli ikitaraplaýyn hyzmatdaşlyk ýola goýuldy. Türkmen-özbek gatnaşyklarynyň geljekde-de ýokary depginde ösdüriljekdigine ynanýaryn” diýlip hatda bellenilýär.

Gahryman Arkadagymyz şu ýakymly mümkinçilikden peýdalanyp, Prezident Şawkat Mirziýoýewe berk jan saglyk, bagtyýarlyk, jogapkärli işinde üstünlikleri, Özbegistanyň doganlyk halkyna bolsa parahatçylyk, ösüş, mundan beýläk-de rowaçlyk arzuw etdi.