Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Özbegistan Respublikasynyň Prezidenti Şawkat Mirziýoýewiň arasynda geçirilen telefon arkaly söhbetdeşlikde deňhukukly, birek-birege ynanyşmak esasynda ýola goýulýan döwletara gatnaşyklaryň esasy ugurlary ara alnyp maslahatlaşyldy.

Gahryman Arkadagymyz, ilki bilen, Prezident Şawkat Mirziýoýewi doglan güni bilen tüýs ýürekden gutlady we onuň baştutanlygynda Özbegistan Respublikasynyň durmuş-ykdysady ösüşde ägirt uly üstünlikleri gazanandygyny hem-de halkyň durmuş derejesiniň yzygiderli ýokarlanýandygyny belledi. Häzirki döwürde Özbegistan okgunly ösýän hem-de ählumumy parahatçylygyň, durnukly ösüşiň üpjün edilmegine ägirt uly goşant goşýan ýurtdur. Türkmenistan doganlyk Özbegistan Respublikasy bilen ýola goýulýan gatnaşyklara ýokary baha berýär we asyrlaryň dowamynda ýakyn goňşy hem-de ygtybarly hyzmatdaş bolup durýan bu ýurt bilen hyzmatdaşlygyň ösdürilmegine möhüm ähmiýet berýär diýip, türkmen halkynyň Milli Lideri nygtady.

Şunuň bilen baglylykda, Türkmenistan bilen Özbegistanyň arasynda netijeli syýasy-diplomatik gatnaşyklaryň saklanylýandygy bellenildi. Iki ýurduň dünýä we sebit syýasatynyň möhüm meseleleri boýunça garaýyşlarynyň ýakyndygy ýa-da doly gabat gelýändigi halkara giňişlikde tagallalary utgaşdyrmak üçin pugta binýat bolup hyzmat edýär. Türkmenistanyň we Özbegistanyň ministrlikleriniň, pudaklaýyn dolandyryş edaralarynyň arasynda yzygiderli, netijeli gatnaşyklar ýola goýuldy. Serhetýaka sebitleriň arasyndaky hyzmatdaşlyk barha işjeňleşdirilýär. Türkmen-özbek söwda-ykdysady gatnaşyklary sazlaşykly ösdürilýär. Medeni, ylmy, ynsanperwer ugurly hyzmatdaşlyk üstünlikli giňeldilýär we pugtalandyrylýar.

Türkmenistan bilen Özbegistan Respublikasynyň arasyndaky däp bolan doganlyk gatnaşyklaryň özara bähbitli strategik hyzmatdaşlyk ruhunda mundan beýläk-de yzygiderli ösdüriljekdigine we çuňlaşdyryljakdygyna ynam bildirip, Gahryman Arkadagymyz ikitaraplaýyn gatnaşyklaryň pugtalandyrylmagyna goşýan ägirt uly goşandy üçin özbek Liderine minnetdarlyk bildirdi.

Söhbetdeşligiň ahyrynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow we Özbegistan Respublikasynyň Prezidenti Şawkat Mirziýoýew birek-birege berk jan saglyk, alyp barýan jogapkärli döwlet işlerinde mundan beýläk-de üstünlik, Özbegistanyň hem-de Türkmenistanyň doganlyk halklaryna bolsa abadançylyk, rowaçlyk arzuw etdiler.