Şu gün hormatly Prezidentimiz Serdar Berdimuhamedowyň tabşyrygy boýunça Mejlisiň Başlygy D.Gulmanowa Niderlandlar Patyşalygynyň Türkmenistandaky Adatdan daşary we Doly ygtyýarly ilçisi Nikolaas Ýakob Shermersden ynanç hatyny kabul etdi.

Milli parlamentiň ýolbaşçysy döwlet Baştutanymyzyň adyndan diplomaty jogapkärli wezipä bellenilmegi bilen gutlap, oňa iki ýurduň arasynda dostluk we hyzmatdaşlyk gatnaşyklaryny mundan beýläk pugtalandyrmak ugrunda alyp barjak işlerinde üstünlikleri arzuw etdi.

Ilçi hoşniýetli sözler üçin hoşallyk bildirip, Niderlandlar Patyşalygynyň ýolbaşçylarynyň hormatly Prezidentimiz Serdar Berdimuhamedowyň adyna mähirli salamyny we iň gowy arzuwlaryny ýetirdi hem-de öz üstüne ýüklenen wezipäni ýerine ýetirmek bilen, oňyn häsiýete eýe bolan döwletara gatnaşyklaryň okgunly ösdürilmegi babatda ähli tagallalary etjekdigini nygtady.

Söhbetdeşligiň dowamynda Nikolaas Ýakob Shermers halkara giňişlikde oňyn Bitaraplyk, deňhukuklylyk, özara bähbitli hyzmatdaşlyk ýörelgelerine esaslanýan strategiýany yzygiderli durmuşa geçirýän Türkmenistanyň içeri we daşary syýasatynyň ileri tutulýan ugurlary bilen tanyşdyryldy. Şeýle hem diplomata Mejlisiň gurluşy we alyp barýan işleri, onuň ýurdumyzda amala aşyrýan giň gerimli özgertmeleriň, toplumlaýyn maksatnamalaryň kanunçylyk-hukuk binýadyny üpjün etmekde eýeleýän orny barada giňişleýin maglumat berildi. Şunuň bilen baglylykda, parlamentara gatnaşyklary giňeltmegiň geljekki mümkinçilikleri barada gyzyklanma bildirilip pikir alşyldy.

Şunda Türkmenistanyň we Niderlandlar Patyşalygynyň ikitaraplaýyn hem-de halkara guramalaryň ugry boýunça köptaraplaýyn görnüşde, şol sanda soňky döwürde oňyn ösüşe eýe bolan ýurdumyzyň we Ýewropa Bileleşiginiň arasyndaky dialogyň çäklerinde netijeli hyzmatdaşlygy işjeňleşdirmäge taýýardyklary tassyklanyldy.

Duşuşygyň ahyrynda däp bolan dostlukly döwletara gatnaşyklaryň iki tarapyň hoşniýetli erk-islegine daýanyp, geljekde-de üstünlikli ösdüriljekdigine, anyk many-mazmun bilen baýlaşdyryljakdygyna ynam bildirildi.

* * * 

Onuň Alyhezreti, Türkmenistanyň Prezidenti

jenap Serdar BERDIMUHAMEDOWA

Siziň Alyhezretiňiz!

Ýurtlarymyzyň arasyndaky dostluk we özara düşünişmek ýörelgelerine esaslanýan gatnaşyklary mundan beýläk-de pugtalandyrmak maksady bilen, men jenap Nikolaas Ýakob Shermersi Niderlandlar Patyşalygynyň Türkmenistandaky Adatdan daşary we Doly ygtyýarly ilçisi wezipesine belledim. Jenap Shermersiň ýokary şahsy häsiýetleri özüne bildirilen ynama we Siziň makullamagyňyza mynasyp boljakdygyna ynam döredýär.

Şunuň bilen baglylykda, Siziň Alyhezretiňizden ony hoşniýetli kabul etmegiňizi hem-de meniň adymdan ähli beýan etjeklerine, hususan-da, Size uly hormat goýýandygym we dostluk baradaky ynandyrmalarymy ýetirende, oňa doly ynanmagyňyzy haýyş edýärin.

Hormatlamak bilen,

WILLEM-ALEKSANDR,

Niderlandlaryň Patyşasy.