Birleşen Arap Emirliklerine iş sapary amala aşyrýan hormatly Prezidentimiz Serdar Berdimuhamedow Dubaýda geçirilen Bütindünýä howa forumynyň açylyş dabarasyna gatnaşdy.

«Dubai EXPO Center» binasynda geçirilen Bütindünýä howa Sammitiniň açylyş dabarasynda Birleşen Arap Emirlikleriniň Prezidenti Şeýh Mohammed Bin Zaýed Al-Nahaýýan we Birleşen Milletler Guramasynyň Baş sekretary Antoniu Guterriş çykyş etdi.

Soňra Ählumumy forum plenar mejlisler görnüşinde işini dowam eder. Ählumumy howa forumynda hormatly Prezidentimiz Serdar Berdimuhamedow çykyş edip, maslahatyň gün tertibiniň meseleleri boýunça ýurdumyzyň garaýyşlaryny beýan eder.

Şeýlelikde, hormatly Prezidentimiz Serdar Berdimuhamedowyň Ählumumy howa forumyna gatnaşmagy Bitarap Türkmenistanyň dünýä bileleşiginiň öňünde öz üstüne alan borçnamalaryny ýerine ýetirmäge ygrarlydygyny ýene-de bir gezek aýdyňlyk bilen görkezdi. Çünki, Ýer biziň umumy öýümizdir. Biz ony geljekki nesiller üçin aýawly saklamalydyrys. Ýurdumyz örän wajyp wezipeleri çözmekde halkara hyzmatdaşlygyny ösdürmäge ýardam bermäge çalşyp, ylalaşykly bilelikdäki hereketleri pugtalandyrmaga anyk goşandyny goşýar. Tutuş adamzadyň geljegi bolsa şol hereketlere baglydyr.