Çuňňur hormatlanylýan Türkmenistanyň Prezidenti!

Sizi Garaşsyz, hemişelik Bitarap ýurdumyzda uly dabaralara beslenip bellenilýän Türkmenistanyň Konstitusiýasynyň we Döwlet baýdagynyň güni mynasybetli türkmen halkynyň hem-de Türkmenistanyň Halk Maslahatynyň adyndan tüýs ýürekden gutlaýaryn. Siziň janyňyzyň sag, ömrüňiziň uzak, mertebäňiziň hemişe belent bolmagyny, ata Watanymyzyň gülläp ösmegi, halkara abraýynyň belende galmagy ugrunda alyp barýan döwletli işleriňiziň mundan beýläk-de rowaçlyga beslenmegini arzuw edýärin.

Hormatly Prezidentimiz!

Siziň baştutanlygyňyzda ata Watanymyzyň özygtyýarlylygynyň, döwlet esaslarynyň hem-de demokratik ýörelgeleriniň bitewüligini, halk häkimiýetliliginiň köpasyrlyk däplerini alamatlandyrýan Türkmenistanyň Konstitusiýasynyň we Döwlet baýdagynyň güni uly ruhubelentlikde bellenilýär. Berkarar döwletiň täze eýýamynyň Galkynyşy döwründe Konstitusiýamyz we Döwlet baýdagymyz häzirki bagtyýar günümiziň, beýik geljegimiziň kepili hökmünde dabaralanýar. Esasy Kanunymyzda öz beýanyny tapan parahatçylyk söýüjilik, hoşniýetli goňşuçylyk, özara bähbitli hyzmatdaşlyk ýörelgeleri, ýaşyl baýdagymyzyň meňzine ornan milli döwletlilik ýolumyzyň mizemezligi Siziň döwlet syýasatyňyzyň özenini düzýär. Bu syýasat eziz Watanymyzyň dünýädäki abraý-mertebesini has-da beýgeldýär.

Esasy Kanunymyz we ýaşyl tugumyz ýurdumyzyň baş döwlet nyşanlary bolmak bilen, halkymyzyň mizemez jebisligini, parahatçylyk, ynsanperwerlik, döredijilik taglymlaryna üýtgewsiz ygrarlydygyny alamatlandyrýar. Paýtagtymyzyň gözel künjeklerinde bina edilen Konstitusiýa binasy we Baş baýdak meýdançasy, döwlet ähmiýetli Arkadag şäherindäki, welaýatlaryň merkezlerindäki, «Awaza» milli syýahatçylyk zolagyndaky belent sütünli baýdak meýdançalary bu gün Döwlet tugumyzyň mukaddesligini has-da dabaralandyrýar.

Belent mertebeli Prezidentimiz!

Siziň baştutanlygyňyzda ähli ugurlar bilen bir hatarda, ýurdumyzyň kanunçylyk ulgamy hem yzygiderli kämilleşdirilip, raýatlaryň hukuklary we azatlyklary kanun taýdan kepillendirilýär. Garaşsyz Türkmenistanyň Konstitusiýasy kanunçylygyň, raýatlaryň hukuklarynyň, azatlygynyň hem-de erkinliginiň berjaý edilişiniň, ýurdumyzyň ösüşiniň kepilidir. Türkmenistanyň Esasy Kanuny adamy jemgyýetiň we döwletiň iň ýokary gymmatlygy diýip yglan edip, raýatlaryň hukuklarynyň, azatlyklarynyň ygtybarly kepili, Watanymyzy gülledip ösdürmäge, halkymyzyň bagtyýar, abadan durmuşyny üpjün etmäge gönükdirilen durmuş-ykdysady özgertmeleriň berk hukuk binýady bolup çykyş edýär.

Siziň taýsyz tagallalaryňyz bilen täze taryhy döwrümizde her bir raýat döwlet tarapyndan özi barada uly aladalaryň edilýändigini gündelik durmuşynda aýdyň görýär. Bilim almak, zähmet çekmek, erkin döredijilik, saglygy goramak, ruhy-medeni taýdan kämilleşmek babatda döredilýän mümkinçilikler, döwlet maksatnamalarynyň üstünlikli durmuşa geçirilmegi Türkmenistanda jemgyýetiň we döwletiň iň ýokary gymmatlygynyň adam hökmünde ykrar edilýändiginiň güwäsidir.

Sarpasy belent Prezidentimiz!

Türkmenistanyň ýaşyl tugunyň özygtyýarly döwlet we dünýä bileleşiginiň doly hukukly agzasy hökmünde BMG-niň ştab-kwartirasynyň öňünde parlap durmagy merdana halkymyzyň kalbyna buýsanç, köňlüne ganat bagyşlaýar. Parahatçylygyň we ynanyşmagyň dabaralanýan ýurdy bolan Türkmenistanda Döwlet baýdagymyzyň saýasynda berkarar Watanymyz durnukly ösüşiň aýdyň ýoluna düşüp, syýasy, ykdysady we medeni ugurlarda okgunly ösýän abraýly ýurt hökmünde halkara giňişlikde ykrar edildi.

Hormatly Prezidentimiz!

Sizi Türkmenistanyň Konstitusiýasynyň we Döwlet baýdagynyň güni mynasybetli türkmen halkynyň hem-de Türkmenistanyň Halk Maslahatynyň adyndan ýene-de bir gezek tüýs ýürekden gutlaýaryn. Siziň janyňyz sag, ömrüňiz uzak, il-ýurt bähbitli, umumadamzat ähmiýetli döwletli başlangyçlaryňyz mundan beýläk-de rowaç bolsun! Goý, Türkmenistanyň Konstitusiýasy türkmen bagtynyň şamçyragy bolup, asyrlara ýalkym saçsyn! Watanymyzyň asudalygynyň, agzybirliginiň, halkymyzyň bagtyýarlygynyň nyşany bolan Döwlet baýdagymyz elmydama belentde parlasyn!

Sizi hormatlamak bilen,

Türkmen halkynyň Milli Lideri, 
Türkmenistanyň Halk Maslahatynyň Başlygy, 
Gahryman Arkadag Gurbanguly Berdimuhamedow