Çuňňur hormatlanylýan Türkmenistanyň Prezidenti!

Sizi eziz Watanymyzyň hemişelik Bitaraplygynyň 30 ýyllyk şanly senesiniň bellenilýän ýylynda Amerikanyň Birleşen Ştatlarynyň Nýu-Ýork şäherinden gelen hoş habar — Birleşen Milletler Guramasynyň Baş Assambleýasynyň 80-nji sessiýasynyň 18-nji plenar mejlisinde «Awaza syýasy Jarnamasy» atly Kararnamanyň kabul edilmegi mynasybetli türkmen halkynyň hem-de Türkmenistanyň Halk Maslahatynyň adyndan tüýs ýürekden gutlaýaryn. Size berk jan saglyk, uzak ömür, Garaşsyz, baky Bitarap döwletimizi mundan beýläk-de ösüşlere beslemek, ýurdumyzyň parahatçylyk söýüjilikli daşary syýasatyny dünýä ýaýmak ugrunda alyp barýan döwletli işleriňizde hemişe rowaçlyklary arzuw edýärin.

Hormatly Prezidentimiz!

Siziň baştutanlygyňyzda ýurdumyz dostlukly döwletara gatnaşyklara ygrarlydygyny, sebit we ählumumy gün tertibindäki möhüm meseleleriň çözgütlerini işläp taýýarlamaga jogapkärli çemeleşýändigini iş ýüzünde görkezip gelýär. Siziň başlyklyk etmegiňizde «Awaza» milli syýahatçylyk zolagynda geçirilen Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahatynyň üstünlikli netijeleri we maslahatyň dowamynda bu döwletleriň geljek on ýyl üçin ösüşiniň strategik ugruny kesgitleýän 2024 — 2034-nji ýyllar üçin Hereketleriň Awaza maksatnamasynyň yglan edilmegi hem-de Awaza syýasy Jarnamasynyň kabul edilmegi munuň aýdyň beýany bolup, ol Ýer ýüzünde parahatçylygy, dostlugy, ynanyşmagy, hoşniýetli hyzmatdaşlyk gatnaşyklaryny ilerledýän ýurt hökmünde Türkmenistanyň abraý-mertebesini has-da dabaralandyrdy. BMG-niň Baş Assambleýasy tarapyndan 57 döwletiň awtordaşlygynda «Awaza syýasy Jarnamasy» atly Kararnamanyň kabul edilendigi barada gelip gowşan şatlykly habar hem döwletimiziň deňze çykalgasy bolmadyk ýurtlaryň durnukly ösüşine saldamly goşant goşýan ýurt hökmünde halkara giňişlikdäki eýeleýän ornuny has-da pugtalandyrýar.

Belent mertebeli Prezidentimiz!

Siz Awaza maslahatynda eden çykyşyňyzda: «Biz Birleşen Milletler Guramasy, dünýäniň onlarça ýurtlaryndan bolan dostlarymyz hem-de pikirdeşlerimiz, abraýly halkara guramalar bilen Türkmenistanda deňze çykalgasy bolmadyk ösüp barýan ýurtlaryň meseleleri, olary çözmegiň ýollary barada garaýyşlarymyzy beýan edýäris» diýip bellemek bilen, ekologiýa, energetika, suw, lukmançylyk diplomatiýasy we ynsanperwer hyzmatdaşlygy ösdürmek ugrunda möhüm başlangyçlary öňe sürdüňiz. Şol başlangyçlaryň ählumumy rowaçlygyň, ösüşiň bähbidine köpugurly hyzmatdaşlygy ösdürmäge, halkara gatnaşyklary ynsanperwerleşdirmäge ýardam berjekdigine berk ynanýaryn.

Çuňňur hormatlanylýan Prezidentimiz!

Siziň baştutanlygyňyzda yglan edilen Halkara parahatçylyk we ynanyşmak ýyly ähli ýurtlara berk we howpsuz dünýäni gurmak, hemmeler üçin durnukly geljegi döretmek babatda tagallalary birleşdirmäge çakylykdyr. Türkmenistanyň teklibi boýunça BMG-niň Baş Assambleýasynyň 79-njy sessiýasynyň 63-nji plenar mejlisinde «BMG-niň Deňze çykalgasy bolmadyk ösüp barýan döwletler boýunça üçünji maslahatyny geçirmegiň tertibine goşmaça maglumat» atly Kararnamanyň biragyzdan kabul edilmegi hem Türkmenistan bilen BMG-niň arasyndaky hyzmatdaşlygyň strategik häsiýete eýediginiň aýdyň mysalyna öwrülip, ýurdumyzyň dünýä ähmiýetli işlere işjeň gatnaşmagynyň ykrarnamasy boldy.

Hormatly Arkadagly Gahryman Serdarymyz!

Sizi Birleşen Milletler Guramasynyň Baş Assambleýasynyň 80-nji sessiýasynyň 18-nji plenar mejlisinde «Awaza syýasy Jarnamasy» atly Kararnamanyň biragyzdan kabul edilmegi mynasybetli türkmen halkynyň hem-de Türkmenistanyň Halk Maslahatynyň adyndan ýene-de bir gezek tüýs ýürekden gutlaýaryn. Siziň janyňyz sag, ömrüňiz uzak, il-ýurt bähbitli, umumadamzat ähmiýetli başlangyçlaryňyz mundan beýläk-de rowaç bolsun! Goý, Garaşsyz, hemişelik Bitarap döwletimiziň Ýer ýüzündäki at-abraýy, şan-şöhraty has-da belende galsyn!

Sizi hormatlamak bilen,

Türkmen halkynyň Milli Lideri,
Türkmenistanyň Halk Maslahatynyň Başlygy,
Gahryman Arkadag Gurbanguly Berdimuhamedow.