“Çagyryş boýunça harby gullugy geçýän harby gullukçylary Türkmenistanyň Ýaragly Güýçlerinden, beýleki goşunlaryndan harby gullukdan boşatmak we Türkmenistanyň raýatlarynyň harby gulluga nobatdaky çagyrylyşy hakynda” Türkmenistanyň Prezidentiniň 2015-nji ýylyň 17-nji martynda çykaran 6728 belgili Permanyny ýerine ýetirmek üçin Türkmenistanyň Prezidenti, Türkmenistanyň Ýaragly Güýçleriniň Belent Serkerdebaşysy Gurbanguly Berdimuhamedow Buýruga gol çekdi.

Türkmenistanyň Prezidentiniň Karary bilen Ogulbagt Annaberdiýewna Çopanowa “Watan” gazetiniň baş redaktorynyň orunbasary wezipesine bellenildi.

Türkmenistanyň we Eýran Yslam Respublikasynyň arasyndaky dost-doganlyk gatnaşyklaryny çuňlaşdyrmak we pugtalandyrmak maksady bilen, Onuň Alyhezreti Eýran Yslam Respublikasynyň Prezidenti doktor jenap Hasan Ruhani Türkmenistanyň Prezidenti Gurbanguly Berdimuhamedowyň resmi çagyrmagy boýunça ýokary derejeli syýasy, ykdysady we medeni wekiliýete baştutanlyk edip, 2015-nji ýylyň 11-nji martynda (1393-nji hijri şemsi ýylynyň 20-nji esfandyna gabat gelýär) Türkmenistana döwlet saparyny amala aşyrdy.

Türkmenistanyň Prezidentiniň Karary bilen, Türkmenistanyň Belarus Respublikasyndaky (Minsk şäheri) Adatdan daşary we Doly ygtyýarly Ilçisi Nazarguly Şagulyýew Türkmenistanyň Garaşsyz Döwletleriň Arkalaşygynyň tertipnamalaýyn we beýleki edaralarynyň ýanyndaky Hemişelik Doly ygtyýarly wekili wezipesine bellenildi.

Türkiýe Respublikasynyň Prezidenti Rejep Taýyp Ärdoganyň çagyrmagy boýunça Türkmenistanyň Prezidenti Gurbanguly Berdimuhamedow 2015-nji ýylyň 3-4-nji marty aralygynda Türkiýe Respublikasynda resmi sapar bilen boldy.

Türkmenistanyň Prezidentiniň Karary bilen Aşyrmyrat Musakowiç Öwezow Balkan welaýatynyň Bereket etrabynyň häkiminiň orunbasary wezipesine bellenildi.

Berkarar döwletimiziň bagtyýarlyk döwründe ilata edilýän jemagat hyzmatlaryny halkara ölçeglerine laýyk guramak, bu ugur boýunça ýokary bilimli hünärmenleri taýýarlamak, şeýle hem Aşgabat şäheriniň binagärlik-şähergurluşyk keşbini has-da gözelleşdirmek maksady bilen, Türkmenistanyň Prezidenti Karara gol çekdi.

Türkmenistanyň Prezidentiniň Karary bilen, Türkmenistanyň Merkezi bankynyň müdiriýetiniň başlygynyň orunbasary Döwletmyrat Amanmyradowiç Mülkiýew Bütindünýä bankynyň Türkmenistandan dolandyryjysynyň orunbasary hem-de Ýewropanyň Täzeleniş we ösüş bankynyň Türkmenistandan dolandyryjysynyň orunbasary wezipesine bellenildi.

Berkarar döwletimiziň bagtyýarlyk döwründe ata Watanymyzy dünýäniň ösen döwletleriniň birine öwürmek boýunça öňde goýan wezipelerimizi üstünlikli durmuşa geçirmek, mähriban halkymyzyň ýaşaýyş-durmuş derejesini has-da ýokarlandyrmak üçin welaýatlarda täze, döwrebap obalary we şäherçeleri gurmagyň depginlerini has-da güýçlendirmek, bölünip berilýän mellek ýerlerinde ähli şertleri bolan hususy ýaşaýyş jaýlaryny gurmak üçin amatly şertleri döretmek maksady bilen, Türkmenistanyň Prezidenti Karara gol çekdi.

Berkarar döwletimiziň bagtyýarlyk döwründe halkymyzyň agzybirliginiň we döwletimiziň Garaşsyzlygynyň hem-de Bitaraplygynyň nyşany bolan Türkmenistanyň Döwlet baýdagynyň şan-şöhratyny has-da belende götermek maksady bilen, Türkmenistanyň Prezidenti Karara gol çekdi.