Netanýa, 2-nji mart (TDH). Şu gün Ysraýylyň Netanýa şäherinde tamamlanan adaty karate boýunça halkara ýaryşynda biziň ildeşlerimiz jemi ýedi medala – 1 altyn, 3 kümüş we 3 bürünç medala mynasyp boldular. Bu bäsleşiklere 7 ýurtdan 100-den gowrak türgen gatnaşdy. Biziň ýurdumyzyň toparynyň düzüminden Rüstem Annaýew altyn medaly eýeledi, oňa ýetginjekler toparynda çykyş edenleriň arasynda taý gelen bolmady. Şu toparda şeýle hem Selim Myratdurdyýew bürünç medala mynasyp boldy. Ol kata (toplumlaýyn maşklar) boýunça hem ýetginjekleriň arasynda geçirilen bäsleşikde özüniň ikinji medalyna -- kümüş medala eýe boldy. Uly ýaşly türgenleriň toparynda çykyş eden Didar Hojaýew kata boýunça hem-de tutluşyklarda degişlilikde kümüş we bürünç medallara mynasyp bolmagy başardy. Ýetginjekleriň arasyndaky bäsleşikde Röwşen Hudaýberenow ikinji orna, uly ýaşlylaryň toparynda çykyş eden Döwlet Berdiýew kata boýunça üçünji orna mynasyp boldular.