Şu gün Astanada iş sapary bilen bolýan türkmen halkynyň Milli Lideri, Halk Maslahatynyň Başlygy Gurbanguly Berdimuhamedow Çarwadarlaryň V Bütindünýä oýunlarynyň açylyş dabarasyna gatnaşdy.

Gahryman Arkadagymzyň Gazagystan Respublikasynyň baştutany bilen duşuşygy tamamlanandan soňra türkmen halkynyň Milli Lideriniň awtoulag kerweni «Astana Arena» stadionyna tarap ugrady. Bu ýerde şu ýyl «Ymgyr sähradaky duşuşyk» şygary bilen geçýän Çarwadarlaryň V Bütindünýä oýunlarynyň resmi açylyş dabarasy boldy.

Sport, medeni we ylmy maksatnamalaryň birleşdirilmegi bu özboluşly taslamanyň esasy aýratynlygydyr. Şularyň özara baglanyşygy sportuň milli görnüşlerini we umuman, çarwa medeniýetini toplumlaýyn öwrenmäge hem-de dünýä ýaýmaga mümkinçilik berýär.

Şu gezekki iri sport çäresiniň resmi nyşanynda Çarwadarlaryň Bütindünýä oýunlarynyň ähli nyşanlarynyň aýrylmaz bölegi bolan Gün şekilindäki atlynyň şekili ýerleşdirilipdir. Nyşanda hakyk daşynyň nepisligini alamatlandyrýan goýy gyzyl reňk ulanylypdyr. Bu gymmat bahaly daş türkmenleriň we Merkezi Aziýanyň beýleki halklarynyň milli şaý-seplerinde giňden ulanylýar. Nyşanda ýazgylar VIII-X asyrlardaky türki ýazuwy äheňinde ýerine ýetirilipdir.

Gyrgyzystanda geçirilen Çarwadarlaryň Bütindünýä oýunlarynyň ilkinji üçüsiniň esasy nyşany suw bolupdy. Bu däp Gazagystanda geçirilýän şu gezekki Oýunlarda hem dowam etdirildi.