Çuňňur hormatlanylýan Türkmenistanyň Prezidenti!

Sizi Berkarar döwletiň täze eýýamynyň Galkynyşy döwründe rysgal-berekede, toý-baýrama beslenip gelen Milli bahar baýramy — Halkara Nowruz güni mynasybetli Türkmenistanyň Halk Maslahatynyň adyndan tüýs ýürekden gutlaýaryn. Size berk jan saglyk, uzak ömür, halkymyzyň bagtyýar durmuşyny üpjün etmek, ýurdumyzyň halkara derejedäki abraýyny artdyrmak ugrunda alyp barýan işleriňizde mundan beýläk-de rowaçlyklary arzuw edýärin.

Hormatly döwlet Baştutanymyz!

Siziň baştutanlygyňyzda Halkara parahatçylyk we ynanyşmak ýylynda ýurdumyzyň ähli künjeklerinde halkymyzyň agzybirligini, jebisligini, asyrlaryň dowamynda kemala gelen däp-dessurlara ygrarlydygyny alamatlandyrýan dabaralar giňden ýaýbaňlandyrylýar. Nesilden-nesle geçip gelýän bu däpler häzirki wagtda täze mazmuna eýe bolýar. Milli bahar baýramy — Halkara Nowruz güni mynasybetli paýtagtymyz Aşgabatda, Arkadag şäherinde, welaýatlarymyzda geçirilýän baýramçylyk dabaralary mähriban halkymyzyň bagtyýarlygynyň, abadançylygynyň, eziz Watanymyzyň gülläp ösüşleriniň özboluşly nyşanyna öwrülýär.

Belent mertebeli Prezidentimiz!

Türkmen halkynyň, şeýle hem Gündogar halklarynyň durmuşyna giňden ornaşan Nowruz baýramy parahatçylyk söýüjilik, ynsanperwerlik, dost-doganlyk ýörelgelerini giňden dabaralandyrýan baýramdyr. Nowruz galkynyşyň, gülleýşiň we täzelenişiň baýramy bolmak bilen, halklaryň arasynda parahatçylygy, agzybirligi, ynanyşmagy kemala getirýär. Birleşen Milletler Guramasynyň Baş Assambleýasynyň Kararnamasy esasynda her ýylyň 21-nji martynyň «Halkara Nowruz güni» diýlip yglan edilmegi bu gadymy baýramyň halkara derejedäki ähmiýetini has-da artdyrýar. ÝUNESKO-nyň Adamzadyň maddy däl medeni mirasynyň sanawyna girizilen Nowruz baýramy dialogyň, medeniýetleriň özara baglanyşygynyň, raýdaşlyk hem-de dost-doganlyk ýaly umumadamzat gymmatlyklarynyň aýdyň mysaly bolup dabaralanýar. Bu baýram mynasybetli geçirilýän çäreler Nowruz baýramyny belleýän halklary birek-birege ýakynlaşdyrmak bilen, medeni-ynsanperwer ýörelgeleriň rowaçlanmagyna goşant goşýar.

Sarpasy belent Prezidentimiz!

Pederlerimiz daşky gurşaw bilen sazlaşykly ýaşamagyň asylly ýörelgelerini, tebigata aýawly çemeleşmegiň däplerini döredipdirler we bize miras galdyrypdyrlar. Türkmen halkynyň aňynda berk ornaşan bu ýörelgeler häzirki wagtda täze mazmun bilen baýlaşdyrylýar. Nowruz ynsan bilen tebigatyň berk arabaglanyşygyny alamatlandyrýar. Ýurdumyzda adam eli bilen döredilen tokaý zolaklarynyň çägi ýyl-ýyldan giňeýär, seýilgähleriň, seýilbaglaryň sany barha köpelýär. Yzygiderli geçirilýän köpçülikleýin bag ekmek çäreleri, Arkadagly Gahryman Serdarymyz, Siziň Diýarymyzy bagy-bossanlyga öwürmäge gönükdirilen ekologiýa ugurly giň gerimli işleriňiziň tutuş halkymyz tarapyndan goldanylýandygyny tassyklaýar.

Nowruz baýramynyň giňden bellenilýän günlerinde merdana babadaýhanlarymyz geljekki bol hasylyň düýbüni tutýarlar. Öz zähmeti bilen türkmen topragynyň rysgal-berekedini artdyrýarlar. Şonuň netijesinde, türkmeniň bereketli saçaklary naz-nygmatlardan dolýar. Nowruz baýramy diňe bir zähmetsöýer ekerançylary ýokary netijeleri gazanmaga ruhlandyrman, milli ykdysadyýetimiziň dürli pudaklarynda işleýän ähli ildeşlerimize Watanymyzyň mundan beýläk-de gülläp ösmeginiň bähbidine has-da belent sepgitlere ýetmäge täze ylham berýär.

Hormatly Arkadagly Gahryman Serdarymyz!

Sizi eziz Diýarymyzda giň gerim bilen bellenilýän Milli bahar baýramy — Halkara Nowruz güni mynasybetli Türkmenistanyň Halk Maslahatynyň adyndan ýene-de bir gezek tüýs ýürekden gutlaýaryn. Siziň janyňyz sag, ömrüňiz uzak, il-ýurt bähbitli, umumadamzat ähmiýetli başlangyçlaryňyz mundan beýläk hem rowaç bolsun!

Sizi hormatlamak bilen,

Türkmen halkynyň Milli Lideri, 

Türkmenistanyň Halk Maslahatynyň Başlygy, 

Gahryman Arkadag Gurbanguly BERDIMUHAMEDOW.