Baş sahypa
\
Jemgyýet
\
«Halkara parahatçylyk we ynanyşmak ýyly: çagalaryň gözýetimi, dünýägaraýşy» atly bäsleşigi yglan edildi
Jemgyýet
«Halkara parahatçylyk we ynanyşmak ýyly: çagalaryň gözýetimi, dünýägaraýşy» atly bäsleşigi yglan edildi
Çap edildi 24.03.2025
1327

Hormatly watandaşlar!

Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň howandarlyk etmeginde çagalaryň arasynda «Halkara parahatçylyk we ynanyşmak ýyly: çagalaryň gözýetimi, dünýägaraýşy» ady bilen döredijilik bäsleşigi yglan edilýär.

Arkadagly Gahryman Serdarymyzyň bagtyýar geljegiň eýeleri bolan döwrümiziň ýaş nesillerini beýik ösüşlere ruhlandyrýan taýsyz aladalaryndan ugur alyp geçirilýän bu bäsleşigiň esasy maksady, ýaşlarymyzy watançylyk ruhunda terbiýelemekden, olaryň döredijilik ukyplaryny ösdürmekden, dünýägaraýşyny giňeltmekden, düşünjelerini baýlaşdyrmakdan, dostluk gatnaşyklaryny ösdürmekden, ruhy-ahlak häsiýetlerini kämilleşdirmekden, zehinli ýaşlary ýetişdirmekden, olaryň eserdeňlik, ünslülik, duýgurlyk, ýatkeşlik terbiýesini kämilleşdirmekden hem-de «Halkara parahatçylyk we ynanyşmak ýylynda» durmuşa geçirilýän işleriň gerimini has-da giňeltmekden ybaratdyr.

Çagalaryň arasynda yglan edilen «Halkara parahatçylyk we ynanyşmak ýyly: çagalaryň gözýetimi, dünýägaraýşy» atly döredijilik bäsleşigine 4 (dört) ýaşdan 11 (on bir) ýaşa çenli çagalar gatnaşyp bilerler.

Bäsleşigiň ýokary guramaçylykly geçmegini üpjün etmek maksady bilen, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy tarapyndan guramaçylyk we eminler toparynyň düzümi tassyklanýar.

Döredijilik bäsleşiginiň eminler toparynyň agzalarynyň hersiniň bir sesi bardyr. Bäsleşigiň netijeleri boýunça çözgütler eminler topary tarapyndan kesgitlener, olaryň gelen netijesi gutarnykly çözgütdir.

Bäsleşik üç ugur boýunça mekdebe çenli çagalar edaralarynda terbiýelenýän körpeleriň hem-de umumybilim berýän orta mekdeplerinde bilim alýan okuwçylaryň arasynda geçiriler.

Bu ugurlar:

– Surat çekmek we amaly haşam sungaty;

– Aýdym-saz we tans sungaty;

– Türkmen milli oýunlary.

Bäsleşigiň birinji ugrunda parahatçylygy, bagtyýar çagalygy, ýurdumyzyň hem-de Arkadag şäherimiziň gözelliklerini, bedew atlarymyzy, gözel tebigatymyzy wasp edýän suratlary çekmek hem-de amaly haşam sungatynyň eserlerini döretmek boýunça özara bäsleşerler.

Bäsleşigiň ikinji ugrunda oňa gatnaşýan çagalar Berkarar döwletimiziň täze eýýamynyň Galkynyşy döwrüniň ösüşlerini, parahatçylygy we dost-doganlygy, bagtyýar çagalygy şirin aýdym-sazlarynda wasp ederler, dürli aýdym-saz gurallaryna ezberlik bilen erk edip, ukyp-başarnyklaryny görkezerler hem-de dürli tanslary ýerine ýetirip bäsleşerler.

Bäsleşigiň üçünji ugrunda oňa gatnaşýan çagalar türkmen milli oýunlary «Çeke-çeke», «Bäş daş», «Agsak durna», «Aşyk oýny», «Ýüzük bukdy», «Düzzüm», «Ýalyga towusmak» ýaly milli oýunlarda özara bäsleşerler.

Bäsleşigiň netijeleri Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň howandarlyk etmeginde 2025-nji ýylyň 29-njy martynda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilen gününiň 4 ýyllygy mynasybetli guralýan çäreleriň çäklerinde jemlener.

Bäsleşigiň ýeňijilerine hormat hatlary we ýadygärlik sowgatlary dabaraly ýagdaýda gowşurylar.

Mähriban watandaşlar!

Bäsleşik boýunça Türkmenistanyň Magtymguly adyndaky Ýaşlar guramasynyň Arkadag şäheriniň Geňeşi bilen habarlaşyp bilersiňiz.

Telefon belgi +993 (12) 57-18-57, şeýle-de «tmyg.arkadag_shaheri@sanly.tm» internet poçtasy arkaly ýüz tutup bilersiňiz.

Soňky habarlar
25.07
Türkmenistanyň Ministrler Kabinetiniň mejlisi
25.07
Türkmenistanyň Prezidenti Hytaý Halk Respublikasynyň Adatdan daşary we Doly ygtyýarly ilçisini kabul etdi
25.07
Hormatly Prezidentimiz “Halkara parahatçylyk we ynanyşmak ýyly” mynasybetli günäsini geçmek baradaky Permana gol çekdi
25.07
Milli taryhy-medeni mirasyň gozgalýan gymmatlyklaryny döwlet tarapyndan hasaba almagyň Tertibi tassyklanyldy
24.07
Türkmenistanyň Prezidenti Russiýa Federasiýasynyň Prezidentine gynanç bildirdi
24.07
Dokma senagaty — milli ykdysadyýetiň möhüm pudaklarynyň biri
24.07
Türkmen halkynyň Milli Lideri, Türkmenistanyň Halk Maslahatynyň Başlygynyň we Özbegistan Respublikasynyň Prezidentiniň arasynda telefon arkaly söhbetdeşlik
24.07
Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň Balkan welaýatyna iş sapary
24.07
Türkmenistanyň Prezidenti Özbegistan Respublikasynyň Prezidentini gutlady
23.07
Ulag ulgamy — dünýä ykdysadyýetiniň ösüşiniň möhüm şertleriniň biri
top-arrow