Hormatly Özbegistan Respublikasynyň Prezidenti!

Hormatly şu günki çärä gatnaşyjylar!

Ilki bilen, bildirilen hormat-sarpa — “Ýokary derejeli dostluk» (“Oliý Darajali Dustlik”) ordeni bilen sylaglandygy üçin Özbegistan Respublikasynyň Prezidenti hormatly Şawkat Miromonowiç Mirziýoýewe minnetdarlyk bildirmäge rugsat ediň! Biziň ýurtlarymyzyň arasyndaky dost-doganlyk gatnaşyklarynyň mizemezliginiň aýdyň subutnamasy bolup durýan bu çäräniň taryhy ähmiýetini bellemek isleýärin.

Prezident Şawkat Mirziýoýew öz çykyşynda Gündogaryň beýik akyldary, ajaýyp türkmen şahyry Magtymguly Pyragy barada aýtdy. Akyldar şahyr öz eserlerinde halklaryň arasyndaky dost-doganlygy wasp edipdir. Onuň “Türkmeniň” atly goşgusyndaky: “Tireler gardaşdyr, urug ýarydyr...” diýen jümlesini mysal hökmünde getirmek isleýärin. Şunuň bilen birlikde, beýik söz ussady Alyşir Nowaýynyň döredijiliginiň ähmiýeti möhümdir. Ol öz goşgularynda: “Dostluk — wepalylyk” diýip ýazypdyr.

Biziň halklarymyz asyrlaryň dowamynda kemala gelen, nesillerden-nesillere geçirilip gelinýän baý medeni we ruhy mirasa eýedir. Häzirki wagtda şöhratly ata-babalarymyzyň döwürleriň hem-de nesilleriň arasyndaky arabaglanyşygy saklamakda möhüm orny eýeleýän asylly däpleri mynasyp dowam etdirilýär. Munuň özi halklarymyza mahsus bolan ula hormat goýmak, kiçini sylamak ýaly ýörelgelerde öz beýanyny tapýar. Men hormatly il ýaşululary bilen iki elläp salamlaşýaryn, bu hormat-sarpanyň we birek-birege hormatyň alamatydyr.

Gadymdan gelýän däplerden ugur alyp, her bir adam öz ömründe hökmany suratda asylly işleri amala aşyrmalydyr. Şoňa görä-de, köpri gurmak, ýol çekmek ýaly halk üçin bähbitli bir işi bitirmek sogap hasaplanýar. Şu ýerde özbek Lideriniň filosofiýasyny bellemek ýerlikli bolar. Onda her bir adamyň asylly işi amala aşyrmagynyň wajypdygyna üns berilýär. Şawkat Miromonowiçiň bu filosofiýasy nusga alarlyk ýörelgedir. Onda dostluk, özara hormat goýmak ýaly düşünjeler öz beýanyny tapýar.

Şawkat Mirziýoýew döwlet Baştutany wezipesine girişen ilkinji günlerinde doganlyk goňşy ýurtlara saparlary amala aşyrdy. Munuň özi umumy taryhy we medeniýeti bolan halklaryň arasynda gatnaşyklary işjeňleşdirmekde möhüm ädim boldy. Özbegistanyň Prezidentiniň öz ilkinji daşary ýurt saparyny Türkmenistana amala aşyrandygy bellärliklidir. Saparyň çäklerinde Özbegistanyň ilkinji Prezidenti Islam Karimowyň ýadygärliginiň açylyş dabarasy boldy. Türkmenlerde hem, özbeklerde hem “Ölüsini sylan beg bolar” diýen paýhasly jümle bar. Bu ýörelgä eýermekde özbek Lideri görelde görkezýär.

Türkmenistana amala aşyran saparynyň barşynda Prezident Şawkat Mirziýoýewiň gatnaşmagynda ýurdumyzda gurlan awtomobil ýolunyň we köprüsiniň açylyş dabarasy boldy.

Biziň ata-babalarymyzyň asyrlaryň dowamynda köpri we ýol gurmagy asylly iş hasaplandyklary tötänden däldir. Şeýle desgalaryň üsti bilen gatnaşyklar ýola goýulýar. Haryt alyşmalary amala aşyrylýar, medeniýetler özara baýlaşýar. Şunuň bilen birlikde, munuň özi halklaryň birek-birege ýakynlaşmagyna hem giň mümkinçilikleri açýar. Bu bolsa häzirki döwrüň wajyp meseleleriniň biri bolup durýar. Mundan başga-da, sebitleýin infrastruktura desgalaryny gurmak boýunça taslamalaryň durmuşa geçirilmegi ýurtlarymyzyň arasyndaky haryt dolanyşygynyň artmagyna, iň esasysy bolsa, halklaryň dostlukly gatnaşyklaryny pugtalandyrmaga, özara hormat goýmak we ynanyşmak ýörelgelerine esaslanýan hyzmatdaşlygy işjeňleşdirmäge ýardam edýär. Umuman, munuň özi adamlaryň bähbidine asylly başlangyçlaryň dabaralanmagyna ýardam berýär.

Men Şawkat Mirziýoýewi köp ýyllar bäri tanaýaryn we Özbegistan Respublikasynda ençeme gezek saparda boldum. Bu saparlaryň her biriniň dowamynda biz bag nahallaryny oturdýarys. Bag bakylygyň nyşanydyr. Bag ekmek biziň halklarymyzyň milli ýörelgelerine laýyk gelýän asylly iş hasaplanýar. Çünki bag köklerini topraga çuňňur aralaşdyryp, barha berkeýär. Biziň halklarymyzyň özboluşlylygyndan ugur alnanda, munuň özi dostlugyň nyşany bolup durýar.

Men bu sylagy — “Ýokary derejeli dostluk” ordenini türkmen halkyna özbek halkyndan sylag hökmünde kabul edýärin. Men, öz gezegimde, Türkmenistanyň we Özbegistanyň doganlyk halklarynyň arasyndaky dostlukly gatnaşyklaryň mundan beýläk-de pugtalandyrylmagy ugrunda ähli tagallalarymy, bilimimi we durmuş tejribämi gaýgyrmaryn.

Prezident Şawkat Mirziýoýewiň filosofiýasynyň çuň manylydygyny hem-de onuň dostlukly gatnaşyklary pugtalandyrmaga gönükdirilendigini ýene-de bir gezek bellemek isleýärin. Özbek Lideri parasatly ýolbaşçy bolmak bilen, halkara giňişlikde uly abraýa eýedir. Pursatdan peýdalanyp, Şawkat Miromonowiçe türkmen halkynyň adyndan minnetdarlyk bildirýärin we oňa berk jan saglyk, döwlet işinde uly üstünlikleri, Özbegistanyň doganlyk halkyna bolsa abadançylyk, bagtyýarlyk, rowaçlyk arzuw edýärin.

(Samarkant şäheri, 2025-nji ýylyň 24-nji apreli)