Tatarstan Respublikasynyň paýtagtynda dowam edýän «Russia Halal Expo 2025» Halkara sergisinde ýurdumyzyň  Milli pawilýony gatnaşýar.

Türkmenistanyň Milli pawilýony ýurdumyzyň ykdysadyýetiň esasy pudaklarynyň ählisinde, şol sanda onuň hususy ulgamynda gazanýan üstünlikleri, özara bähbitli uzakmöhletli hyzmatdaşlyk üçin bar bolan kuwwat bilen tanyşmaga mümkinçilik berýär.  

Ýurdumyzyň pawilýonynda ykdysadyýetiň esasy pudaklarynyň, şol sanda ýangyç – energetika, himiýa, azyk, ýeňil, hususan-da, dokma senagatynyň önümleri, gurluşyk hem-de timarlaýyş serişdeleri we beýleki önümler görkezilýär. Önümçiligiň diwersifikasiýalaşdyrylmagy hem-de sanly ulgama geçilmegi netijesinde ýurdumyzyň elektron senagaty okgunly ösýär. Bu ulgamyň gazananlary elektron enjamlarynyň dürli görnüşleri arkaly giňden görkezilýär. 

Türkmenistanyň pawilýonynda halkymyzyň täsin medeni mirasynyň aýrylmaz bölegi bolup durýan milli sungatyň däp bolan görnüşleriniň önümleri hem görkezilýär. Görkezilýän gymmatlyklaryň hatarynda meşhur türkmen halylary we ajaýyp şaý-sepler bar. Zehinli türkmen halyçylarynyň we zergärleriniň elleri bilen döredilen bu ajaýyp önümler gözelligi we inçeligi bilen tutuş dünýäde meşhurdyr.