Türkmenistanyň Magtymguly adyndaky Ýaşlar guramasynyň Merkezi Geňeşiniň ýanyndaky «Arkadagly Ýaşlar» atly elektron žurnalynyň 2025-nji ýyldaky 7-nji sany iýul aýynyň ahyrynda okyjylara hödürlendi.

BMG-niň Deňze çykalgasy bolmadyk ösüp barýan ýurtlar boýunça üçünji maslahaty we ajaýyp Awaza dabarasy ýaşlar neşiriniň täze sanynda öz beýanyny tapýar. Ilkinji sahypalarda ýerleşdirilen goşgy we makala bu aýdanlarymyzyň mysalydyr. Neşiriň bu sanyndaky iňlis dilinde taýýarlanylan makalalaryň biri hem halkara foruma bagyşlanypdyr.

Täze okuw ýylynyň ýakynlaşýan günlerinde okyjylara ýetirilen neşiriň bu sanynda degişli temada makala ýerleşdirildi. Şol makalada täze okuw ýylynyň ruhy we giriş synaglary öz beýanyny tapýar.

Ýaş okyjylar neşiriň bu sanynda ýurdumyzyň gurluşyk pudagynyň ösüşlerine bagyşlanan iňlis dilindäki makalany, türkmen dutarynyň gymmaty we ahalteke bedewlerimiziň taryhy orny baradaky täsirli çykyşlary hem okap bilerler. Neşir bu sanynda ýaş alymlaryň käbiriniň aýry-aýry makalalaryny hem paýlaşýar. Olarda gozgalýan ylmy meseleleriň derwaýyslygy okyjylaryň ünsüni özüne çekýär.

Neşiriň täze sanynda ýerleşdirilen goşgular okyjylary duýgular dünýäsine syýahata alyp gidýär. Okyjylar Jorj Kleýsonyň «Wawilonyň iň baý adamy» atly kitabyndan ýene bir bölegi okap bilerler. Dünýäniň iň owadan howa menzilleri baradaky makalany okap, bir demde jahana seýran edersiňiz. Täsirli täleýnama, tomus bilen bagly makalalar toplumy, miweli doňdurmanyň taýýarlanylyşy barada maglumat neşiriň ilkinji sahypalaryndan ahyrky bölümlerine çenli täsirini ýitirmezligini üpjün edýär.

Däp bolşy ýaly, ahyrky sahypalarda «Ýaş waspçy» atly bäsleşigiň täze ýeňijisi bilen tanyşdyrylýar. Neşir ýaşlara Türkmenistanyň Ýaşlar baýragyna dalaş etmek üçin resminamalaryň kabul edilýändigini hem ýatladýar.