Türkmenistanyň Konstitusiýasyna laýyklykda iş alyp barýan halk häkimiýetiniň iň ýokary wekilçilikli edarasy bolan Halk Maslahatynyň her mejlisi Türkmenistanyň jemgyýetçilik-syýasy durmuşynda möhüm wakadyr. Onuň ýakynda, sentýabr aýynda boljak mejlisi ýurdumyzyň Garaşsyzlygynyň 34 ýyllygynyň we Türkmenistanyň hemişelik Bitaraplygynyň 30 ýyllygynyň öňüsyrasynda geçiriler, bu bolsa foruma aýratyn ähmiýet berýär.

Halk häkimiýetiniň iň ýokary wekilçilikli edarasy işe başlan pursadyndan başlap ileri tutulýan we esasy meseleleriň biri hökmünde ilat üçin eşretli durmuşy üpjün etmek diýip kesgitledi. Göz öňünde tutulan maksada ýetmek bolsa, ilkinji nobatda, durnukly we ösýän ykdysadyýete, şeýle hem halk hojalygynyň oba hojalygy we hyzmat pudagy ýaly beýleki pudaklaryna baglydyr.

Jemgyýetçilik ösüşi Halk Maslahatynyň hemişe üns merkezinde bolupdy we şeýle bolmagynda galýar, bu meselä hemişe uly üns berilýär, çünki hut şu mesele adamlaryň üstünliklerini we maddy hal-ýagdaýyny gönüden-göni üpjün edýär. Halk Maslahatynyň mejlislerinde ara alnyp maslahatlaşylýan ähli durmuş-ykdysady maksatnamalarda we resminamalarda 2030-njy ýyla çenli ösüşiň şu üç sütüni, ýagny ykdysadyýet, ýaşaýyş-durmuş we ekologiýa üns merkezinde boldy.

Häzirki wagtda Halk Maslahatynyň kararlaryna laýyklykda, ýurdumyzda Durnukly ösüş maksatlaryny milli maksatnamalara goşmak we uýgunlaşdyrmak boýunça yzygiderli işler alnyp barylýar, munuň netijesinde bu ugurda uly üstünlikler gazanylýar. Bu iş durmuş syýasaty we adam mümkinçiliginiň ösmegi, abadançylygyň ýokarlandyrylmagy we ilatyň ýaşaýyş-durmuş şertleriniň gowulandyrylmagy bilen gönüden-göni baglanyşyklydyr.

Owal bellenip geçilişi ýaly, ýurdumyzyň ilatynyň ýokary derejede durmuş taýdan goragyny üpjün etmek ykdysady ösüşiň ileri tutulýan ugurlaryndan biridir. Býujet serişdeleriniň agramly bölegi ýaşaýyş-durmuş üpjünçilige ugrukdyrylýar, bu-da ilatyň aladalaryna üns berilýändigine şaýatlyk edýär. «Berkarar döwletiň täze eýýamynyň Galkynyşy: Türkmenistany 2022 – 2052-nji ýyllarda durmuş-ykdysady taýdan ösdürmegiň Milli maksatnamasynyň» üstünlikli durmuşa geçirilmegi bolsa adamlaryň ýaşaýyş şertlerini yzygiderli gowulandyrýar. Mundan başga-da, ykdysady kuwwaty berkitmek boýunça meýilnamalaýyn kararlar täze iş ýerleriniň döredilmegine, durmuş taýdan goragy üpjün etmäge we adamlaryň saglygyny hem abadançylygyny artdyrmaga ýardam edýär.

Häzirki wagtda Türkmenistan ykdysadyýeti diwersifikasiýalaşdyrmak we oňa innowasion tehnologiýalary ornaşdyrmak boýunça milli hem döwlet maksatnamalaryny işjeň durmuşa geçirmegini dowam etdirýär. Bu işiň oňyn netijeleri sebit we halkara hyzmatdaşlygyna täze itergi berýän iri göwrümli taslamalarda aýdyň görkezilýär. Amatly tebigy we ykdysady şertler, daşary ýurtly maýadarlar üçin ýeňillikler we artykmaçlyklar ýurt üçin täze mümkinçilikleri açýar. Ýurdumyzyň maýa goýum syýasaty hem adamlaryň durmuş derejesini ýokarlandyrmaga gönükdirilendir.

Halk Maslahatynyň häzirki wagtda alyp barýan işleri ýurdumyzyň ýokary derejede durmuş-ykdysady ösüşiniň täze, kämil mehanizmlerini döretmäge, bu işi netijeli dolandyrmaga, kanun çykaryjy we hukuk goldawyna we ýerine ýetiriji guramalaryň guramaçylyk esaslaryna gönükdirilendir. Munuň esasy maksady bolsa ilatyň abadan durmuşyny üpjün etmek we her bir adam üçin amatly ýaşaýyş gurşawyny döretmekdir.