Aziýanyň Futbol Konfederasiýasynyň Kubogyny almak ugrundaky bäsleşikleriň çäklerinde Balkanabatda toparlaýyn tapgyryň “D” toparynda geçirilen dördünji aýlawda türkmen futbol klublarynyň arasynda ikinji duşuşyk geçirildi. Onda “Altyn asyr” topary “Ahal” toparyny - 1:0 hasabynda sähelçe artykmaçlyk bilen utdy. Oýnuň birinji ýarymyna goşmaça goşulan wagtda paýtagtly toparyň oýunçysy Serdar Geldiýew pökgini derwezä saldy. Ikinji ýarymda toparlar oýnuň barşyny üýtgetmäge çalyşdylar, ýöne oýnuň dartgynlylygy artsa-da, derwezelere gönükdirilen pökgüler netijesiz boldy. Ýeňiş gazanan toparyň futbolçylary garşydaşlaryna ýiti we yzygiderli hüjüm etdiler. Netijede, “Altyn asyr” 8 utuk jemläp, bäsleşiklerde oýna gatnaşmagyny dowam etdi. Toparyň öňdebaryjysy bolan Täjigistanyň “Istiklol” topary Gyrgyzystanyň “Alaý” toparyny oýnuň ahyrky minutlarynda geçiren pökgüsi bilen 3:2 hasabynda ýeňmegi başardy. “Ahal” topary bolsa toparda üçünji basgançagy eýeleýär.