Şu gün Türkmenistanyň Gyzyl Ýarymaý milli jemgyýetiniň (TGÝMJ) merkezi edarasynyň mejlisler zalynda utgaşykly görnüşde “Watansöýüjilik we ynsanperwerlik ýörelgeleri” ady bilen wagyz-nesihat çäresi geçirildi. Oňa TGÝMJ-niň, Birleşen Milletler Guramasynyň Bosgunlaryň işi baradaky Ýokary komissarynyň müdirliginiň Merkezi Aziýa boýunça wekilhanasynyň, Gyzyl Haç we Gyzyl Ýarymaý jemgyýetleriniň halkara federasiýasynyň, Halkara Gyzyl Haç komitetiniň Türkmenistandaky wekilleri gatnaşdylar.

1926-njy ýylda esaslandyrylan Türkmenistanyň Gyzyl Ýarymaý milli jemgyýeti Gyzyl Haç we Gyzyl Ýarymaý jemgyýetleriniň halkara hereketinde ýurdumyza wekilçilik edýär. TGÝMJ iň irki ynsanperwer jemgyýetçilik guramalarynyň biri bolmak bilen, döwletimizde durmuşa geçirilýän durmuş-ykdysady özgertmelere, hususan-da, raýatlaryň durmuş goraglylygyny üpjün etmek, ilatyň saglygyny goramak, maşgala institutynyň derejesini berkitmek, ýaş nesilleri ata-babalarymyzyň ýagşylyk, duýgudaşlyk, ýakynlaryňa hemaýat etmek ýaly asylly ýörelgeleri esasynda terbiýelemek ýaly ugurlarda alnyp barylýan işlere işjeň gatnaşýar.

Çärede iri halkara guramalar, ilkinji nobatda, BMG-niň düzümleri bilen ýola goýlan hyzmatdaşlygyň giň ugurlary ara alnyp maslahatlaşyldy. Bu guramalar bilen alnyp barylýan bilelikdäki işler Türkmenistanyň Gyzyl Ýarymaý milli jemgyýetiniň işgärleriniň we meýletinçileriniň bilim derejesini ýokarlandyrmakda bar bolan mümkinçilikleri has-da artdyrmaga ýardam edýär.

Türkmenistanyň demokratik, hukuk we dünýewi döwlet bolmak bilen, ählumumy gün tertibiniň möhüm meseleleriniň çözülmegine, şol sanda ynsanperwer ýörelgeleriň, gymmatlyklaryň berkarar edilmegine gönükdirilen başlangyçlary öňe sürýändigine aýratyn üns çekildi. Garaşsyz, Bitarap ýurdumyz adam hukuklaryny, bähbitlerini goramagy döwlet syýasatynyň esasy ugurlary hökmünde yglan edip hem-de halkara hukugyň umumy ykrar edilen kadalaryny ileri tutup, degişli resminamalary berjaý etmek boýunça öz üstüne alan borçnamalaryna yzygiderli eýerýär. Şunuň bilen baglylykda, milli jemgyýetiň alyp barýan işiniň Gyzyl Haç we Gyzyl Ýarymaý halkara hereketiniň ynsanperwerlik, özygtyýarlylyk, meýletinlik ýaly esasy ýörelgelerine laýyk gelýändigi bellenildi.

Degişli ministrlikler we pudaklaýyn dolandyryş edaralary bilen hyzmatdaşlyk etmegiň çäklerinde göz öňünde tutulan meýilnamalar barada hem durlup geçildi. Bu meýilnamalar toplanan bilimleri alyşmagy, iş maslahatlaryny guramagy, okuw çärelerini geçirmegi maksat edinýär. Şeýle-de “Türkmenistanda halkara ynsanperwer hukugyny ornaşdyrmak boýunça 2024 — 2026-njy ýyllar üçin çäreleriň meýilnamasy” ara alnyp maslahatlaşyldy.

Mälim bolşy ýaly, TGÝMJ Türkmenistanyň Prezidentiniň Karary esasynda 2011-nji ýylda döredilen Türkmenistanyň adam hukuklary we halkara ynsanperwer hukugy babatda halkara borçnamalarynyň ýerine ýetirilişini üpjün etmek boýunça pudagara toparyň iş toparynyň düzümine girýär. Şunuň bilen baglylykda, halkara ynsanperwer hukugy barada bilimleri ýaýratmak we ony kanunçylyga ornaşdyrmak boýunça TGÝMJ-niň zerur işleri alyp barýandygy bellenildi. Gyzyl Ýarymaý jemgyýeti pudagara toparyň işine işjeň gatnaşýar. Onuň başlangyjy boýunça okuw maslahatlary guralýar, orta mekdepleriň mugallymlary üçin okuw gollanmalary taýýarlanyldy.

Şeýle hem çykyşlarda Halkara Migrasiýa Guramasynyň hemişelik agzasy hökmünde Türkmenistanyň bu ugurda taslamalarydyr maksatnamalary durmuşa geçirmek bilen, dünýä jemgyýetçiliginiň tagallalaryna uly goşant goşýandygy nygtaldy. Ýurdumyz BMG-niň esasy halkara hukuk resminamalaryna goşulyp, öz üstüne alan borçnamalaryna ygrarlydygyny iş ýüzünde tassyklaýar. Şol resminamalaryň hatarynda Bosgunlaryň derejesi hakynda, Apatridleriň derejesi hakynda, Raýatsyzlygy azaltmak hakynda Konwensiýalar bar. Şeýle-de ýurdumyzda raýatlygy bolmadyk adamlara raýatlyk bermek we ýaşamak üçin ygtyýarnama bermek babatda uly işler alnyp barylýar.

Şu ýylda Magtymguly Pyragynyň doglan gününiň 300 ýyllygyny ýurdumyzda hem-de daşary döwletlerde giňden bellemek bilen baglanyşykly meselelere-de garaldy. Beýik akyldar şahyryň döredijilik mirasy bahasyna ýetip bolmajak milli gymmatlyk, dünýäniň medeni hazynasynyň hem aýrylmaz bölegidir. Şahyryň goşgulary hiç haçan gymmatyny ýitirmejek umumadamzat gymmatlyklaryny aýdyň beýan edýändigi, ata Watany söýmäge, ynsanperwerlige, parahatçylyk söýüjilige, dost-doganlyga çagyrýandygy bilen kalplarda orun alýar.