Türkmenistanyň Dokma senagaty ministrliginiň Daşoguz şäherindäki «Çeper» tikin fabriginiň işgärleri köp sanly mekdep eşiklerini taýýarlaýarlar.

Tikin fabrigiň işgärleri ýurdumyzda açylan mekdep ýarmarkalaryna işjeň gatnaşyp, mekdep lybaslarynyň köp dürlüsini hödürleýärler. Kärhananyň önümlerine ýokary hilliligi we elýeterliligi sebäpli hemişe uly isleg bildirilýär. Önümleriň içerki bazarda bäsdeşlige ukyply bolmagyny üpjün etmek üçin fabrik dünýä belli öndürijileriň häzirki zaman köpugurly tikin enjamlary bilen enjamlaşdyrylandyr.

Tikin fabriginiň şu günki görnüşi çagalar we ulular üçin onlarça eşik, düşek, ýorgan we öý dokma önümlerini öz içine alýar. Hünärmenleriň toplan tejribesi we işjeň döredijilik gözlegleri netijesinde, şu ýylyň başyndan bäri, tikin fabriginde on million manatdan gowrak önüm öndürildi.