Ýakyn goňşy we sebit döwletleri bilen ikitaraplaýyn hem-de köptaraplaýyn gatnaşyklary ösdürmek ýurdumyzyň Gahryman Arkadagymyz tarapyndan başy başlanyp, Arkadagly Gahryman Serdarymyzyň baştutanlygynda üstünlikli durmuşa geçirilýän daşary syýasatynyň ileri tutulýan ugurlarynyň biridir. Bu babatda Merkezi Aziýa ýurtlary bilen dürli ugurlardaky hyzmatdaşlygy uzak möhletleýin esasda ilerletmäge aýratyn ähmiýet berilýär.

24-25-nji noýabrda hormatly Prezidentimiziň Gazagystan Respublikasyna amala aşyran döwlet sapary iki doganlyk halkyň taryhyň dowamynda emele gelen umumylygyna daýanýan özara gatnaşyklary mundan beýläk-de pugtalandyrmagyň ýolunda möhüm ädim boldy.

Prezidentler Serdar Berdimuhamedow bilen Kasym-Žomart Tokaýewiň arasynda geçirilen gepleşikleriň dowamynda ikitaraplaýyn gatnaşyklary ugurlaryň giň topumy boýunça ösdürmegiň meseleleri ara alnyp maslahatlaşyldy, sebit hem-de halkara gün tertibiniň möhüm ugurlary barada pikir alşyldy. Şunuň bilen birlikde, Türkmenistanyň Merkezi Aziýa döwletleriniň Baştutanlarynyň konsultatiw duşuşyklarynyň, “Merkezi Aziýa +” formatynyň, beýleki sebit mehanizmleriniň çäklerinde özara hereketleri mundan beýläk-de ösdürmäge taýýardygy tassyklanyldy. Şunda Merkezi Aziýa döwletleriniň Baştutanlarynyň konsultatiw duşuşyklaryna Azerbaýjanyň doly hukukly agza hökmünde goşulmagynyň möhüm ähmiýetine üns çekildi. Munuň özi sebit formatynyň ornuny pugtalandyrmak bilen, Merkezi Aziýanyň hem-de Günorta Kawkazyň özara baglanyşygyny ýokarlandyrmaga ýardam eder.

Hormatly Prezidentimiz iki doganlyk halkyň bähbidine strategik hyzmatdaşlygy mundan beýläk-de pugtalandyrmaga gönükdirilen özara gatnaşyklaryň ileri tutulýan ugurlaryny kesgitledi. Şunuň bilen baglylykda, ekologiýa ulgamynda senagat galyndylaryny gaýtadan işlemek, “ýaşyl” gurluşyk, Aral we Hazar deňizleriniň ekoulgamyny goramak ýaly ugurlarda hyzmatdaşlygy ilerletmegiň möhümdigi nygtaldy. Döwlet Baştutanymyz özara haryt dolanyşygynyň durnukly ösýändigini aýdyp, Türkmenistanyň energetika ulgamynda hyzmatdaşlygy dowam etdirmäge taýýardygyny, uglewodorod serişdelerini çykarmagyň netijeliligini we ekologik howpsuzlygy ýokarlandyrmak boýunça tejribe alyşmaga açykdygyny tassyklady. Şeýle hem elektroenergetika, himiýa senagaty, metallurgiýa, maşyngurluşyk, dokma senagaty, nebithimiýa, tebigy gazy gaýtadan işlemek, şäher gurluşygy pudaklarynda hyzmatdaşlygyň gerimini giňeltmegiň möhümdigine üns çekildi.

Ulag-logistika ulgamy-da ikitaraplaýyn hyzmatdaşlygyň strategik ugurlarynyň biri hökmünde kesgitlenildi. Häzirki emele gelen geosyýasy we geoykdysady şertlerde Gündogar — Günbatar, Demirgazyk — Günorta ugurlary boýunça hereket edýän üstaşyr ulag geçelgelerini işjeňleşdirmek wezipesiniň aýratyn möhüm ähmiýete eýe bolýandygy bellenildi. Sanly ykdysadyýet, innowasiýalar hem geljegi uly ugurlaryň biridir. Suw serişdelerini netijeli peýdalanmak meselesi ikitaraplaýyn, şeýle-de sebit gün tertibinde möhüm orny eýeleýär. Ylym, bilim, medeniýet, saglygy goraýyş, bedenterbiýe we sport ulgamlarynda hyzmatdaşlygy ösdürmek babatda-da giň mümkinçilikleriň bardygyna üns çekildi.

Prezident Kasym-Žomart Tokaýew iki ýurduň arasynda dostlugy, özara düşünişmegi we strategik hyzmatdaşlygy berkitmekde döwlet Baştutanymyzyň şahsy goşandyny belläp, şu gezekki gepleşikleriň netijeleri boýunça gazanylan ylalaşyklaryň üstünlikli durmuşa geçirilmeginiň gazak-türkmen gatnaşyklarynda täze sahypany açjakdygyna ynam bildirdi hem-de hormatly Prezidentimizi Gazagystan Respublikasynyň iň ýokary sylagy — “Altyn Kyran” ordeni bilen sylaglady.

Duşuşyklaryň netijeleri boýunça dürli ulgamlarda ikitaraplaýyn hem-de sebit hyzmatdaşlygyny mundan beýläk-de çuňlaşdyrmak üçin berk binýady döretmäge gönükdirilen resminamalaryň uly toplumyna gol çekildi. Döwlet Baştutanymyzyň Gazagystan Respublikasyna döwlet saparynyň çäklerinde ýurdumyzyň wekiliýetiniň agzalary gazak kärdeşleri bilen ikitaraplaýyn duşuşyklary geçirdiler. Olaryň dowamynda özara gyzyklanma bildirilýän ugurlarda hyzmatdaşlygy ösdürmegiň mümkinçilikleri ara alnyp maslahatlaşyldy.

24-nji noýabrda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow dekabr aýynda ýurdumyzyň hemişelik Bitaraplygynyň 30 ýyllygyna bagyşlanyp “Awaza” milli syýahatçylyk zolagynda geçiriljek “Häzirki zaman jemgyýetinde zenanlaryň orny: Durnukly ösüş maksatlaryna ýetmek ugrunda halkara hyzmatdaşlygyny ösdürmek” atly halkara maslahata görülýän taýýarlyk işleriniň ýagdaýy bilen tanyşmak üçin Balkan welaýatyna iş saparyny amala aşyrdy. Gahryman Arkadagymyz bu ýerde 2025-nji ýylyň “Halkara parahatçylyk we ynanyşmak ýyly” diýlip yglan edilmegi we Türkmenistanyň hemişelik Bitaraplygynyň 30 ýyllygy mynasybetli çäreleri ýokary derejede geçirmek boýunça guramaçylyk döwlet toparynyň nobatdaky iş maslahatyny geçirdi.

Türkmen halkynyň Milli Lideri Awazada döredilmegi meýilleşdirilýän Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň şahamçasynda iş alyp barjak hünärmenleriň netijeli işlemekleri üçin döredilen şertler, “Häzirki zaman jemgyýetinde zenanlaryň orny: Durnukly ösüş maksatlaryna ýetmek ugrunda halkara hyzmatdaşlygyny ösdürmek” atly halkara maslahatyň geçiriljek binasynyň enjamlaşdyrylyşy, toplumyň otaglarynda döredilen mümkinçilikler bilen tanyşdy. Halk Maslahatynyň Başlygy bu ýerde döredilen şertleriň häzirki zaman talaplaryna we halkara ülňülere laýyk gelmeginiň forumyň ýokary guramaçylyk derejesinde geçirilmeginde ähmiýetli boljakdygyna ünsi çekdi. Şol bir wagtyň özünde bu ýerde haýyr-sahawat gaznasynyň alyp barýan işlerine, ýurdumyzda zenanlaryň zähmetine goýulýan sarpany şöhlelendirýän gymmatlyklardyr maglumatlar görkezilmelidir. Forumyň çäklerinde guraljak giň möçberli sergide bolsa zenanlaryň jemgyýetiň ähli ulgamlaryna işjeň gatnaşýandygy, olaryň durmuş derejesiniň yzygiderli gowulandyrylmagy ugrunda döwlet derejesinde alada edilýändigi bilen baglanyşykly görkezijiler öz beýanyny tapmalydyr.

Hökümet agzalarynyň we Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň wise-prezidentleriniň gatnaşmagynda geçirilen guramaçylyk döwlet toparynyň nobatdaky iş maslahatynda Gahryman Arkadagymyzyň Balkan welaýatyna amala aşyran iş saparynyň çäklerinde kesgitlenen wezipeleri ýerine ýetirmegiň ugurlary ara alnyp maslahatlaşyldy. Hususan-da, zenanlaryň jemgyýetde eýeleýän ornuna we olaryň ählumumy durnukly ösüşiň üpjün edilmegine goşýan goşandyna bagyşlanan halkara maslahatyň, onuň çäklerinde guraljak serginiň guramaçylyk derejesine aýratyn üns çekildi. Şeýle-de gaznanyň Awazada dörediljek şahamçasynyň sazlaşykly işiniň ýola goýulmagy babatda degişli tabşyryklar berildi. Munuň özi bu düzümiň ynsanperwer işiniň geriminiň has-da giňemegini şertlendirer hem-de halkara jemgyýetçilikde eýeleýän ornuny pugtalandyrar.

Milli Liderimiz halkara çäreleri guramaçylykly geçirmek babatda ähli düzümleriň sazlaşykly işiniň ýola goýulmalydygyny aýdyp, Halkara parahatçylyk we ynanyşmak ýylynyň möhüm çäreleriniň üstüni ýetirjek halkara maslahatlardyr duşuşyklaryň anyk meýilnamasyny işläp taýýarlamagy tabşyrdy.

28-nji noýabrda hormatly Prezidentimiz Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onda döwlet durmuşyna degişli birnäçe meselelere seredildi. Hususan-da, döwlet Baştutanymyz ýurdumyzyň kanunlaryny kämilleşdirmek we döwrebaplaşdyrmak boýunça alnyp barylýan işleri dowam etdirmegiň zerurdygyny belledi. Bank ulgamynyň işini kämilleşdirmek, onuň hyzmatlaryny giňeltmek maksady bilen, ýurdumyzyň bank edaralarynda ýyllyk maliýe hasabatlaryna audit barlaglaryny geçirmekde tejribeli daşary ýurt auditor kompaniýalaryny saýlap almak boýunça halkara bäsleşikleri yglan etmek barada karara gelindi. Döwlet Baştutanymyz ýurdumyzyň nebitli känlerinde, şol sanda täze burawlanan ulanyş guýularynda geçirilen işleriň netijesinde gazkondensat akymy alnan “Uzynada” käninde nebitiň çykarylyşyny artdyrmak boýunça zerur çäreleri görmegi tabşyrdy.

Oba hojalyk pudagyny toplumlaýyn ösdürmek boýunça işleri dowam etdirmegiň hem-de bugdaý ekilen meýdanlarda agrotehniki kadalara görä ideg etmek, pagta meýdanlarynda galan hasyly soňky hanasyna çenli ýygnap almak boýunça işleri berk gözegçilikde saklamagyň möhümdigi nygtaldy. Bilim ulgamynda mugallymlaryň we bilim edaralarynyň ýolbaşçylarynyň hünär taýýarlygyny kämilleşdirmek, okuw maksatnamalaryny, okuw kitaplaryny, gollanmalary döwrebaplaşdyrmak, okuw işine häzirki zaman tehnologiýalaryny, emeli aňy ornaşdyrmak işlerini mundan beýläk-de netijeli dowam etdirmegiň zerurdygy bellenildi. Hormatly Prezidentimiz ýurdumyzyň demir ýol ulagy pudagynyň maddy-enjamlaýyn binýadyny, pudagyň üstaşyr ulag mümkinçiligini ýokarlandyrmak babatda daşary ýurt kompaniýalary bilen hyzmatdaşlygy pugtalandyrmak boýunça taýýarlanylan teklipleri goldady.

Mejlisde Halkara parahatçylyk we ynanyşmak ýyly, Halkara Bitaraplyk güni, Türkmenistanyň hemişelik Bitaraplygynyň 30 ýyllygy mynasybetli şu ýylyň dekabr aýynda geçiriljek esasy çäreleriň we açylyp ulanmaga beriljek medeni-durmuş maksatly binalaryň Tertibi barada hasabat berildi. Şunuň bilen bir hatarda, Nebitgaz senagaty we geologiýa işgärleriniň güni mynasybetli baýramçylyk çäresiniň, estrada, höwesjeň aýdymçy ýaşlaryň arasynda yglan edilen «Ýylyň parlak ýyldyzy» atly bäsleşigiň jemleýji tapgyrynyň geçirilmegi meýilleşdirilýär. Halkara Bitaraplyk güni, Täze ýyl baýramy bilen baglylykda, bazarlarda ilatyň dürli önümlere bolan isleglerini doly kanagatlandyrmak üçin 5-nji dekabrdan başlap ýurdumyzyň welaýatlarynda hem-de Aşgabat, Arkadag şäherlerinde ýerleşýän söwda merkezlerinde, bazarlarda, dükanlarda baýramçylyk söwdalaryny amala aşyrmak, göçme söwda nokatlaryny gurnamak göz öňünde tutulýar.

Täze — 2026-njy ýyly mynasyp garşylamak maksady bilen, paýtagtymyzyň esasy medeniýet ojaklarynda, şaýollarynda, dynç alyş seýilgählerinde, medeni-köpçülikleýin çäreleriň geçiriljek ýerlerinde Täze ýyl arçalaryny bezemek göz öňünde tutulýar. Däp bolşy ýaly, “Älem” medeni-dynç alyş merkeziniň öňünde Baş arça gurnalar. 31-nji dekabrda bu medeni-dynç alyş merkezinde, Arkadag şäherindäki «Arkadag Binasynyň» öňündäki meýdançada, welaýatlardaky «Türkmeniň ak öýi» binalarynyň öňündäki baýramçylyk meýdançalarynda geçiriljek Täze ýyl teleköprüsi bolsa paýtagtymyzyň myhmanlaryny we dabara gatnaşyjylary baglanyşdyrar.

Türkmenistanyň Birleşen Milletler Guramasynyň ynsanperwer ugur boýunça işleýän edaralary bilen hyzmatdaşlyk etmek meseleleri mejlisde ara alnyp maslahatlaşylan möhüm meseleleriň biri boldy. Döwlet Baştutanymyzyň garamagyna Statistika baradaky döwlet komitetiniň hem-de Telewideniýe, radiogepleşikler we kinematografiýa baradaky döwlet komitetiniň ÝUNISEF-niň Türkmenistandaky wekilhanasy bilen ýakyn ýyllar üçin iş meýilnamalary hödürlenildi. Bu resminamalar çagalar bilen bagly ýokary hilli statistiki maglumatlar bilen üpjün etmek, hasabatlylygy kämilleşdirmek, köpölçegli klasterleýin syn bilen bagly hünär ýokarlandyryş çärelerini geçirmek, maglumatlardan milli derejede netijeli peýdalanmak, çagalar barada edilýän işleri köpçülikleýin habar beriş serişdeleri we maglumat beriş çäreleri arkaly giňden beýan etmek üçin taýýarlanyldy. Şolaryň arasynda beýleki ugurdaş döwlet düzümleriniň birnäçesiniň ÝUNISEF-niň wekilhanasy bilen 2026-njy ýyl üçin iş meýilnamalary hem bar.

Türkmenistanda gender deňligi boýunça Hereketleriň milli meýilnamasynyň ýerine ýetirilmegine ýardam bermek, bu ugurda toplumlaýyn işi kämilleşdirmek maksady bilen, Mejlis, Ýokary kazyýet, Döwlet, hukuk we demokratiýa instituty, Bedenterbiýe we sport baradaky döwlet komiteti bilen BMG-niň Ilat gaznasynyň Türkmenistandaky wekilhanasynyň 2026-2027-nji ýyllar üçin, Türkmenistanyň Statistika baradaky döwlet komiteti bilen Ilat gaznasynyň Türkmenistandaky wekilhanasynyň 2026-njy ýyl üçin iş meýilnamalary taýýarlanyldy. Hormatly Prezidentimiz BMG-niň ynsanperwer ugur boýunça işleýän edaralary bilen hyzmatdaşlygy ösdürmegi dowam etdirmegiň wajypdygyna ünsi çekdi we bu ugurda taýýarlanylan teklipleri goldap, degişli tabşyryklary berdi.

29-njy noýabrda Türkmenistanyň Halk Maslahatynyň Başlygy Gurbanguly Berdimuhamedow Arkadag şäherinde bolup, şäheriň gurluşygynyň ikinji tapgyrynda alnyp barylýan işleriň maksatnamasy, gurulmagy meýilleşdirilýän desgalaryň şekil taslamalary bilen tanyşdy. Türkmenistanyň at gazanan arhitektory Gahryman Arkadagymyz “akylly” şähere barýan ýoluň ugrundaky aýlawly çatrykda ýerleşýän, Arkadag şäheriniň keşbi seleňläp görünýän «Polatly» binasynyň ýanyna geldi, “Ahalteke atlary” şaýoluny döwrebaplaşdyrmak boýunça, şeýle-de täze metjidiň gurluşygynda alnyp barylýan işler bilen tanyşdy, medeni-dynç alyş seýilgähiniň bezeg aýratynlyklary barada öz maslahatlaryny berdi.

Milli Liderimiz bina edilmegi meýilleşdirilýän medeni-durmuş maksatly desgalaryň taýýarlanan taslamalary bilen tanyşdy. Şolaryň hatarynda Arkadag şäheriniň lukmançylyk klasteriniň dolandyryş binasynyň, ýol-ulag düzümine degişli desgalaryň taslamalary bar. Gurluşygy alnyp barylýan desgalarda ýokary hil derejesiniň üpjün edilmegine, olaryň bellenen möhletlerde tamamlanmagyna, şäheriň ekologik ýagdaýynyň ýokary derejede saklanylmagyna, binagärligiň dünýä nusgalyk milli mekdebiniň usullarynyň döwrebap derejede ulanylmagyna we olaryň täzeçil tehnologiýalar bilen utgaşykly alnyp barylmagyna, Arkadag şäheriniň gurluşygynda sanly tehnologiýalaryň ornaşdyrylmagyna aýratyn üns çekildi. Şunuň bilen baglylykda, ýurdumyzda häzirki zamanyň ösen tehnologiýalaryndan baş çykarýan maglumat tehnologiýalary (IT) boýunça hünärmenleriň sanyny artdyrmak boýunça işleri işjeňleşdirmegiň möhümdigi bellenildi.

Geçen hepdede milli mirasymyzy gorap saklamak hem-de wagyz etmek boýunça giň gerimli işleriň çäklerinde Türkmenistanyň Döwlet medeniýet merkeziniň Döwlet muzeýine we Arkadag şäheriniň Taryhy we ülkäni öwreniş muzeýine arheologik tapyndylary tabşyrmak dabaralary geçirildi. Muzeýlere gowşurylan gymmatlyklaryň hatarynda Gadymy Nusaý, Altyndepe, Namazgadepe, Ýylgynlydepe, Garadepe, Paryzdepe ýaly dünýä belli ýadygärliklerden, Ahal welaýatynyň beýleki gadymy ilatly ýerlerinden dürli ýyllarda tapylan 300-den gowrak arheologik tapyndy, şol sanda at heýkeljigi, toýun gaplar, metal merdiwan, peýkam ujy, iş gurallary we beýlekiler bar.

Türkmen tennisçileriniň Isa-Taun şäherindäki Politehniki uniwersitetiniň meýdançasynda geçirilen Dewisiň kubogy ugrundaky zolaklaýyn ýaryşda gazanan üstünligi ýurdumyzyň hemişelik Bitaraplygynyň 30 ýyllyk baýramynyň öňüsyrasyndaky ajaýyp wakalaryň biri boldy. Türgenlerimiz 14 toparyň arasynda ýokary derejeli ýaryşa iki sany ýollanma almak ugrunda ýekeleýin we jübütleýin duşuşyklarda garşydaşlarynyň birinden hem ýeňilmän, 2026-njy ýylda Aziýa we Okeaniýa zolaklarynyň IV toparynda çykyş etmäge hukuk gazandylar.

Şeýlelikde, geçen hepdäniň wakalary ýurdumyzda Halkara parahatçylyk we ynanyşmak ýyly, Halkara Bitaraplyk güni we Türkmenistanyň hemişelik Bitaraplygynyň 30 ýyllygy mynasybetli baýramçylyk dabaralaryna görülýän taýýarlyk işleriniň, hormatly Prezidentimiz Serdar Berdimuhamedowyň baştutanlygynda üstünlikli durmuşa geçirilýän, Watanymyzy hemmetaraplaýyn ösdürmäge, halkymyzyň abadançylygyny ýokarlandyrmaga, ählumumy parahatçylygyň we durnukly ösüşiň bähbidine hoşniýetli goňşuçylyk gatnaşyklaryny pugtalandyrmaga gönükdirilen giň möçberli işleriň rowaçlyklara beslenýändiginiň aýdyň güwäsi boldy.