Geçen hepdede Türkmenistanyň Döwlet haryt-çig mal biržasynyň söwdalarynda geleşikleriň 64-si hasaba alyndy. Daşary ýurt puluna Amerikanyň Birleşen Ştatlaryndan, Birleşen Arap Emirliklerinden, Şweýsariýadan, Owganystandan, Gazagystandan we beýleki ýurtlardan gelen telekeçiler Türkmenbaşydaky nebiti gaýtadan işleýän zawodlar toplumynda öndürilen awtobenzini, suwuklandyrylan gazy, gidroarassalanan dizel ýangyjyny, yşyklandyryş kerosinini satyn aldylar. Seýdiniň nebiti gaýtadan işleýän zawodynda öndürilen dizel ýangyjy, “Türkmenhimiýa” döwlet konserninde öndürilen tehniki ýod, ownuk däneli hlorly kaliý, karbamid we tehniki uglerod Russiýadan, ABŞ-dan, BAE-den, Owganystandan, Ermenistandan, Täjigistandan gelen täjirleriň geleşikleriniň esasyny düzdi. Bulardan başga-da, daşary ýyrt walýutasyna dürli görnüşli boýalan tüýjümek we jinsi önümler, hojalyk pamygy, nah ýüplük, aşgarlanmadyk mata, portlandsement ýerlenildi. Satyn alan ýurtlar: RF, Birleşen Arap Emirlikleri, Owganystan, Gyrgyzystan, Özbegistan we beýlekiler. Geleşikleriň umumy bahasy ABŞ-nyň 51 million 28 müň dollaryndan gowrak boldy. Manat serişdelerine Beýik Britaniýanyň, Ermenistanyň we beýleki ýurtlaryň işewür toparlarynyň wekilleri jemi bahasy 5 million 775 müň manatlykdan gowrak nah ýüplük, arassalanmadyk çig ýagly kislota satyn aldylar. Ýurdumyzyň telekeçileri içerki bazar üçin jemi bahasy 105 müň manatlyga barabar gurluşyk tehnikasyny satyn aldylar.