3601
Türkmenistanda döwlet ähmiýetli ilkinji Arkadag şäheriniň açylmagyna bagyşlanan dabaraly çäreleriň çäklerinde opera sazlarynyň konserti boldy.
Ýurdumyzyň Medeniýet ministrligi tarapyndan guralan bu çäre bir gün öňýany açylan Aman Gulmämmedow adyndaky döwlet drama teatrynda geçirildi.
Konserte Türkmenistanyň opera ussatlary bilen birlikde türki döwletleriň opera aýdymçylarynyň hem gatnaşmagy oňa aýratyn ähmiýet berdi.
Olaryň çykyşlaryna Resul Gylyjowyň ýolbaşçylygyndaky Türkmen döwlet simfoniki orkestri sazandarlyk etdi. Konsertden soň diňleýjiler, guramaçylar we artistleriň özleri-de ähli çykyşlaryň ajaýyp sazlaşygyny we utgaşygyny bellediler.
Bu konsert hormatly Prezidentimiz Serdar Berdimuhamedowyň alyp barýan halkara medeni diplomatiýasynyň, şol sanda türki dilli halklaryň umumy adamzat medeni hazynasynyň aýrylmaz bölegi bolan baý mirasyny gorap saklamagy, öwrenmegi we ýaýratmagy maksat edinýän TÜRKSOÝ bilen gepleşikleriň ösdürilmegi boýunça-da üstünliginiň ýene bir subutnamasy boldy.
