Gahryman Arkadagymyzyň başlangyjy bilen esaslandyrylan «Galkynyş» milli at üstündäki oýunlar topary Türkiýe Respublikasynyň Stambul şäherinde geçirilen 8-nji Halkara etnosport medeniýeti festiwalyna gatnaşdy. Munuň özi hormatly Prezidentimiziň 2026-njy ýylyň şygaryny nazara alyp gol çeken resminamasyna laýyklykda, türkmen atly ýigitleriniň ýurdumyzda we daşary döwletlerde atçylyk hem-de atçylyk sporty boýunça guralýan halkara çärelere işjeň gatnaşýandyklaryny görkezýär. Bütindünýä etnosport konfederasiýasy tarapyndan guralan etnofestiwala dünýäniň dürli ýurtlaryndan köp sanly wekiller gatnaşdy.

“Galkynyş” milli at üstündäki oýunlar toparynyň giň möçberli halkara festiwala gatnaşmagy “Garaşsyz, baky Bitarap Türkmenistan — bedew batly at-myradyň mekany” ýylynyň ýurdumyz üçin taryhy ähmiýeti bolan wakalarynyň many-mazmun taýdan has-da baýlaşmagyny şertlendirdi. Mälim bolşy ýaly, bu topar dünýäniň dürli ýurtlarynda geçirilýän abraýly halkara bäsleşiklere gatnaşyp, baýrakly orunlara mynasyp bolýar. Bu bolsa meşhur toparyň we ady rowaýata öwrülen ahalteke bedewleriniň abraýyny artdyrýar.

Festiwalyň çäklerinde dürli ýurtlardan gelen milli medeni toparlar öz halklarynyň däp-dessurlaryny, at üstündäki oýunlaryny, sportuň milli görnüşlerini görkezdiler. Halkara etnosport medeniýeti festiwalynda “Galkynyş” toparynyň çykyşlary has-da täsirli boldy. Toparyň ýerine ýetiren çylşyrymly tilsimleri bu ýerde ýaýbaňlandyrylan dabaranyň ýatda galyjy pursatlaryna öwrüldi. Toparyň agzalarynyň dünýäde meşhurlyk gazanan ahalteke bedewleri bilen sazlaşykly hereketleri myhmanlarda aýratyn täsir galdyrdy. Olar ahalteke bedewlerine we halkara giňişlikde uly abraýa eýe bolan toparyň çykyşlaryna uly höwes bilen tomaşa edip, şowhunly el çarpyşmalar bilen ýokary baha berdiler.

Häzirki döwürde ýurdumyzda Gahryman Arkadagymyzyň we Arkadagly Gahryman Serdarymyzyň tagallalary netijesinde atçylyk sportunyň dürli görnüşleri işjeň ösdürilýär. Şunda “Galkynyş” milli at üstündäki oýunlar toparyna möhüm ornuň degişlidigini bellemek gerek.

Halkara festiwalda Ýaponiýanyň, Müsür Arap Respublikasynyň, Gazagystanyň, Gyrgyzystanyň, Azerbaýjanyň, Ispaniýanyň, Litwanyň, Russiýanyň, Italiýanyň, Özbegistanyň, Meksikanyň, Bangladeşiň, Gruziýanyň, Liwanyň, Tanzaniýanyň we başga-da birnäçe döwletiň toparlarynyň çykyşlary ýaýbaňlandyryldy. Medeni-köpçülikleýin çäreler, halk tanslary, aýdym-sazlar, sahna oýunlary bilen utgaşykly dowam eden festiwalda türkmen atly ýigitleriniň çykyşlary has-da täsirli boldy.

Bu festiwal halklaryň özara ýakynlaşmagynda, milli däp-dessurlaryň giňden wagyz edilmeginde, taryhy ähmiýeti bolan gymmatlyklary ylmy taýdan öwrenmekde özara tejribe alyşmak üçin ähmiýetli meýdança hasaplanýar. Munuň özi medeni-ynsanperwer ulgam boýunça ýola goýulýan halkara gatnaşyklaryň has-da ösdürilmegine giň ýol açýar.

Dünýäniň 24 ýurdundan müňden gowrak wekiliň gatnaşmagynda geçirilen Halkara etnosport medeniýeti festiwalynyň jemleýji güni ýatda galyjy pursatlara baý boldy. Onda festiwala gatnaşyp, ýokary netijeleri görkezen toparlar sylaglanyldy. Öz ýeňişleri bilen ahalteke bedewleriniň abraýyny belende göterýän “Galkynyş” milli at üstündäki oýunlar toparynyň çykyşlaryna festiwalyň ýapylyş dabarasynda hem möhüm orun berildi. Toparyň festiwalyň ýokary derejeli baýragyna mynasyp bolmagy onuň at üstündäki oýunlar boýunça ýokary ussatlyga ýetendiginiň we toparyň agzalarynyň çykyşlarynyň halkara derejede ýokary baha mynasyp bolýandygynyň aýdyň güwäsidir. Dünýäde uly şöhrat gazanan topara gowşurylan baýraklar onuň halkara medeni hyzmatdaşlygy pugtalandyrmaga, halkymyzyň milli gymmatlyklaryny giňden wagyz etmäge mynasyp goşant goşýandygynyň hem ykrarnamasydyr.