Ýurdumyzyň sungat ussatlary şu ýylyň 16 – 18-nji iýuly aralygynda Koreýa Respublikasynda geçirilen halkara dostluk günleriniň çäginde guralan «Beýik Ýüpek ýoluna «Arirang» arkaly medeni syýahat» atly çärä gatnaşyp, uly üstünlik gazandylar. «Garaşsyz, baky Bitarap Türkmenistan — bedew batly at-myradyň mekany» ýylynyň taryhy ähmiýeti bolan wakalarynyň many-mazmun taýdan baýlaşmagyny şertlendiren bu waka ýurdumyzda milli medeniýetimiziň we sungatymyzyň ösdürilmegi hem-de dünýä çykmagy ugrunda döwlet derejesinde edilýän aladanyň aýdyň netijesidir.

Gahryman Arkadagymyzyň milli medeniýetimizi we sungatymyzy dünýä çykarmak ugrunda edýän tagallalarynyň Arkadagly Gahryman Serdarymyzyň ýolbaşçylygynda üstünlikli dowam etdirilmegi netijesinde halkara medeni gatnaşyklar ösüşiň täze derejesine çykýar. Bu bolsa türkmen halkynyň dünýä nusgalyk sungatynyň hemmetaraplaýyn ösdürilmegine we onuň dünýä çykmagyna giň ýol açýar.

Maýa Kulyýewa adyndaky Türkmen milli konserwatoriýasynyň uly mugallymy B.Gaýypow hem-de Lebap welaýatynyň Çärjew etrap medeniýet merkeziniň artisti, aýdymçy A.Jumaýew Koreýa Respublikasynda geçirilen «Beýik Ýüpek ýoluna Arirang arkaly medeni syýahat» atly çärede üstünlikli çykyş edip, halkara festiwalynyň ýadygärlik nyşanyna mynasyp boldular.

Dostlukly ýurtda geçirilen halkara medeni çäresinde ýurdumyzyň sungat ussatlarynyň gazanan döredijilik üstünlikleri Berkarar döwletiň täze eýýamynyň Galkynyşy döwründe medeniýet we sungat işgärleriniň kämil eserleri döretmekleri we olaryň halkara derejesinde guralýan bäsleşiklere, festiwallara gatnaşmaklary ugrunda döwlet derejesinde edilýän tagallalaryň aýdyň netijesidir.

Halkara derejesinde geçirilen döredijilik çäresinde üstünlik gazanan ildeşlerimiz ösüşleriň belentliklerine tarap bedew bady bilen ynamly gadam urýan ýurdumyzyň ýeten derejesini, halkymyzyň bagtyýar durmuşyny we ýurdumyzda amala aşyrylýan beýik maksatlary wasp etmek hem-de halkara bäsleşiklerine gatnaşmak ugrunda döredilýän mümkinçilikler üçin milli medeniýetiň we sungatyň hak howandarlary Gahryman Arkadagymyza hem-de Arkadagly Gahryman Serdarymyza hoşallyk bildirdiler.